Qazaqstan jáne Ulybrıtanııa depýtattary ózara yntymaqtastyq máselelerin talqylady
LONDON. QazAqparat – Qazaqstan jáne Brıtan Parlamentaralyq yntymaqtastyq jónindegi toptardyń jetekshileri onlaın kezdesip, qos eldiń koronavırýsty eńserýi jáne Breksıtten keıingi áriptestik taqyryby boıynsha oı bólisti.
Sonymen qatar brıtanııalyq Lordtar jáne Qaýymdar palatasynyń depýtattary Qazaqstan Prezıdenti Qasym-Jomart Toqaevtyń 2 jylda atqarǵan reformalaryna baǵa berdi, dep habarlaıdy QazAqparat tilshisi.
Ian Makkenzı Maknıkol - Ulybrıtanııa parlamenti joǵary palatasynyń múshesi, leıborshylar partııasynyń ókili. 51 jastaǵy lord Londonnyń ońtústik-shyǵysynda turady. Pandemııa bastalǵaly metrony qoıyp, parlamentke velosıpedpen qatynaı bastaǵan.
«Ulybrıtanııa astanasynda velosıpedshilerge barlyq jaǵdaı jasalǵan. Oǵan qosa velosıpedtiń qorshaǵan ortaǵa esh zııany joq», deıdi saıasatker.
Búgin de ol qazaqstandyq áriptesterimen onlaın-kezdesýge temir tulparymen kelip, ekologııalyq problemalar taqyrybyn qozǵady.
«Klımattyq daǵdarys baǵytynda birlese jumys isteýge kóp múmkindikter bar. Birikken Koroldik jáne Qazaqstan Respýblıkasynyń úkimetteri birlese otyryp, joǵary nátıjelerge jetkize alady», - deıdi lord.
Elderdiń kovıdpen kúrestegi jetistikteri de basty taqyryptardyń birine aınaldy.
Ulttyq statıstıka qyzmetiniń málimetterinshe, brıtanııalyqtardyń 80 protsentiniń aǵzasynda antıdeneler bar. Olar aýyryp shyǵýdyń nemese vaktsınalaýdyń nátıjesinde túzilgen. Brıtanııalyq parlamentarııler Qazaqstanda shyǵarylǵan ekpeniń bolashaǵyna zor úmitpen qaraıtyndyqtaryn aıtty.
«Bizdiń bilýimizshe, Qazaqstan otandyq vaktsınasyn shyǵardy. Bul Ortalyq Azııa memleketteri úshin úlgi bolarlyq óte jaqsy jańalyq. Ekpeni ári qaraı jetildirý úshin ǵalymdardy jumyldyrý, áleýetti ınvestorlardy habardar etý jaǵynan qoldaý bildirýge ázirmiz» - dedi Ulybrıtanııa Parlamenti Qaýymdar palatasynyń depýtaty, Qazaqstanmen yntymaqtastyq jónindegi jalpypartııalyq parlamenttik toptyń tóraǵasy polkovnık Bob Stıýart.
Onyń qazaqstandyq áriptesi, QR Parlament Májilisiniń depýtaty Vakıl Nabıev: «Memleket pandemııa kezinde shamamen 15 mlrd AQSh dollaryn, ıaǵnı Іshki jalpy ónimniń 9 protsentin halyqty jáne bıznesti qoldaý úshin bóldi. Biz koronavırýske qarsy kúreste halyqaralyq qaýymdastyqpen, onyń ishinde brıtanııalyq áriptesterimizben de birlese jumys isteýge ázirmiz», - dep túıindedi.
Depýtattar Qasym-Jomart Toqaev prezıdenttiginiń eki jylyn saralaı kele, onyń saıası reformalaryn da talqylady. Ásirese, aımaq ákimderin saılaý týraly bastamasyna erekshe toqtaldy.
«Birikken Koroldikte merlerdi saılaý dástúri ejelden qalyptasqan. Sizderde saılaý ótkennen keıin, aımaq basshylary ózara kezdesip, tájirıbe almasýlaryna bolady dep oılaımyn», dedi Ulybrıtanııa Qaýymdar palatasynyń depýtaty Martın Vıkkers.
Ulybrıtanııa Breksıtten keıin Eýroodaq elderimen baılanysyn úzgen emes. Biraq jańa memlekettermen tikeleı qarym-qatynas ornatý baǵytynda da jumys istep jatyr. Qazirdiń ózinde 70 elmen saýda-sattyq boıynsha kelisimge keldi. Jıynǵa qatysýshylar Qazaqstan bul tizimge 71-shi bolyp enedi degen senim bildirdi.
