Qazaqstan jáne Reseı SІM basshylary Máskeýde kezdesedi
ASTANA. QazAqparat - 20 qańtarda Reseı Federatsııasynyń Syrtqy ister mınıstri S.V.Lavrov Máskeýde Qazaqstan Respýblıkasynyń Syrtqy ister mınıstri Q.Q.Ábdrahmanovpen kezdesedi. Bul týraly Reseı SІM-niń resmı ókili Marııa Zaharova kúndelikti brıfıng barysynda habardar etti.
Mınıstrler Reseı-Qazaqstan qarym-qatynasynyń birqatar ózekti máselelerin talqylap, kúntártibindegi óńirlik jáne halyqaralyq taqyryptar boıynsha is-qımyl jasasýǵa egjeı-tegjeıli sholý jasaıdy.
«Basty nazar Reseı men Qazaqstannyń EAEO, UQShU, TMD jáne ShYU aıasyndaǵy ózara is-qımylǵa aýdarylady. BUU QK yntymaqtastyǵy taqyrybyn talqylaý da kózdelgen. Belgilisi, Qazaqstan 2017-2018 jj. BUU organynyń turaqty emes múshesi retinde Azııa-Tynyqmuhıt memleketteriniń úlken tobynyń múddesin qorǵaıdy», - delingen Reseı SІM resmı saıtyndaǵy habarlamada.
Sondaı-aq, 2017-2018 jj. eki memlekettiń syrtqy ister mınıstrlikteriniń arasyndaǵy yntymaqtastyq josparyna qol qoıý kózdelgen, onyń ishinde Reseı men Qazaqstan arasynda dıplomatııalyq baılanys ornaýynyń 25 jyldyǵyna arnalǵan is-qımyldar bar. Eske sala ketsek bul 1992 jyly 22 qazanda bolǵan.
«20 qańtardaǵy kezdesý kópdeńgeıli Reseı-Qazaqstan dıalogynyń jáne odaqtas memleketter men strategııalyq seriktes eki eldiń syrtqy saıası vedomstvosynyń qyzmetin úılestirýdiń kezekti oqıǵasy bolmaq», - delingen habarlamada.
Sonymen qatar, Astana protsesi aıasyndaǵy kelissózder 23 qańtarǵa josparlanǵan.
