Qazaqstan jáne Ózbekstan úkimet basshylary sý salasyndaǵy yntymaqtasty talqylady
ASTANA. KAZINFORM - Qazaqstan Premer-Mınıstri Álıhan Smaıylov Almatyda Eýrazııalyq úkimetaralyq keńes otyrysy qarsańynda Ózbekstan Premer-Mınıstri Abdýlla Arıpovpen kelissózder júrgizdi.
Kezdesý barysynda taraptar saýda-ekonomıkalyq yntymaqtastyqty nyǵaıtý, aýyl sharýashylyǵy, tranzıttik-kóliktik jáne gaz salalaryndaǵy ózara is-qımyl máselelerin talqylady. Atap aıtqanda, ekijaqty taýar aınalymyn arttyrý boıynsha Jol kartasynyń júzege asyrylý barysy jáne kooperatsııalyq ónerkásiptik jobalar jumysynyń nátıjeleri qaraldy.
Jıynda memleketaralyq sý qatynastaryn keńeıtýge de erekshe nazar aýdaryldy. Taraptar qalyptasqan áriptestik joǵary deńgeıde ekenine toqtalyp, buryn qol jetkizilgen ýaǵdalastyqtardy oryndaýǵa jáne ózara is-qımyldy odan ári kúsheıtýge daıyn ekenderin rastady. Bul, basqa ortaq máseleler qatarynda transshekaralyq sý obektilerin birlesip basqarýǵa jáne paıdalanýǵa qatysty da aıtyldy.
Álıhan Smaıylov Qazaqstan Ózbekstanmen strategııalyq áriptestikti damytýǵa erekshe kóńil bóletinin atap ótti.
«Memleket basshylarymyzdyń erik-jigeriniń arqasynda bizdiń ózara is-qımylymyz búkil óńir úshin úlgi boldy», — dedi Úkimet basshysy.
Premer-Mınıstrdiń aıtýynsha, Ózbekstan – Qazaqstannyń iri saýda seriktesteriniń biri. 2022 jyly taýar aınalymynyń kólemi josparlanǵan $5 mlrd-qa jetti. Ótken jyldyń 11 aıynda ózara saýda da jaqsy nátıje kórsetip, $4,1 mlrd-ty qurady.
«Bizdiń aldymyzda taýar aınalymyn $10 mlrd-qa deıin jetkizý mindeti tur, sondyqtan saýda-ekonomıkalyq baılanystardy keńeıtý boıynsha júıeli sharalar qabyldaý qajet. Qazaqstan Úkimeti belgilengen barlyq maqsattarǵa qol jetkizý úshin birlesip belsendi jumys isteýge daıyn», — dep atap ótti Álıhan Smaıylov.
Óz kezeginde Abdýlla Arıpov Ózbekstan men Qazaqstan arasyndaǵy strategııalyq áriptestik dostyq pen tatý kórshilik jáne ózara qurmet rýhynda qarqyndy damyp kele jatqanyn atap ótti.
«Memleketterimizdiń basshylary eki el arasyndaǵy kópqyrly qarym-qatynastardy odan ári damytýdyń naqty mindetterin aıqyndady. Biz sizdermen birge osy mindetterdi oryndaý úshin barlyq qajetti sharalardy qabyldaýǵa daıynbyz», — dedi Ózbekstan Premer-Mınıstri.
