Qazaqstan jáne OPEK+ uıymyna múshe taǵy jeti el munaı óndirisin kóktemge deıin ózgerissiz qaldyrdy
ASTANA. KAZINFORM — Munaı óndirisin qosymsha erikti túrde shekteýge qatysatyn OPEK+ uıymyna kiretin segiz el 2026 jyldyń 1 aqpanynda álemdik naryq jaǵdaıaty men perspektıvalaryn qarastyrý úshin vırtýaldy kezdesý ótkizdi. Onyń qorytyndysy boıynsha óndiristi birinshi toqsannyń sońyna deıin aǵymdaǵy deńgeıde ustap turý týraly sheshim qabyldandy.
Qazaqstan, Saýd Arabııasy, Reseı, Irak, BAÁ, Kýveıt, Aljır jáne Oman jahandyq ekonomıkalyq áleýettiń turaqtylyǵy men munaı naryǵynyń qazirgi ýaqyttaǵy saý kórsetkishteri aıasynda naryqtyń turaqtylyǵyna degen mindettemelerin rastaıdy, bul qorlardyń tómendiginen kórinip otyr.
— Qatysýshy segiz el 2025 jyldyń 2 qarashasynda maýsymdyq aýytqýlarǵa baılanysty 2026 jyldyń naýryz aıynda óndiristi kezeń-kezeńmen arttyrýdy toqtata turý týraly sheshimin rastady, — delingen OPEK habarlamasynda.
Osylaısha, OPEK+ «segizdigi» táýligine 1,65 mln barrel óndiris kólemi naryq jaǵdaılarynyń ózgerýine baılanysty ishinara nemese tolyǵymen qalpyna keltirilýi múmkin ekenin rastady.
— Elder naryq jaǵdaıyn muqııat baqylaýdy jáne baǵalaýdy jalǵastyrady jáne naryq turaqtylyǵyn saqtaý boıynsha úzdiksiz kúsh-jigerinde olar 2023 jyldyń qarashasynda jarııalanǵan buryn engizilgen táýligine 2,2 mln barrel kóleminde erikti túzetýlerdi qosa alǵanda qosymsha erikti óndiris túzetýlerin odan ári toqtata turý nemese keri qaıtarý úshin abaılap saqtyq tásil jáne tolyq ıkemdilikti saqtaýdyń mańyzdylyǵyn rastady, — delingen OPEK otyrysy qorytyndysynyń kommıýnıkedesinde.
Elder Birlesken mınıstrlik monıtorıng komıteti (BMMK) qadaǵalaıtyn qosymsha erikti óndiris túzetýlerin qosa alǵanda Yntymaqtastyq týraly deklaratsııany tolyq oryndaýǵa ujymdyq mindettemelerin rastady. Olar sondaı-aq 2024 jyldyń qańtarynan bastap kez kelgen artyq óndiris kólemin tolyǵymen óteý nıetin rastady.
Naýryzdaǵy óndiris kvotalary 2025 jyldyń jeltoqsan aıyndaǵy deńgeıde qaldy:
* Saýd Arabııasy — táýligine 10,103 mln barrel;
* Reseı — táýligine 9,574 mln barrel;
* Irak — táýligine 4,273 mln barrel;
* BAÁ — táýligine 3,411 mln barrel;
* Kýveıt — táýligine 2,580 mln barrel;
* Qazaqstan — táýligine 1,569 mln barrel;
* Aljır — táýligine 971 myń barrel;
* Oman — táýligine 811 myń barrel.
OPEK+ «segizdigi» naryqtyq jaǵdaıatqa sholý jasaý, kelisimniń saqtalýyn jáne ótemaqyny qaraý úshin aı saıyn kezdesý ótkizetin bolady. Kelesi kezdesý 2026 jyldyń 1 naýryzynda ótedi.
2026 jyly munaıǵa suranys qandaı bolatynyna qatysty OPEK boljamyn myna materıaldan oqı alasyz.