Qazaqstan jáne OPEK+ uıymyna múshe basqa jeti el sáýirden bastap munaı óndirisin arttyrady
ASTANA. KAZINFORM — OPEK+ uıymyna múshe segiz el, sonyń ishinde Qazaqstan, 2026 jyldyń sáýir aıynan bastap munaı óndirisin arttyrý týraly sheshim qabyldady. Aı saıynǵy ósim táýligine 206 000 barreldi quraıdy, dep habarlaıdy Kazinform.
Buǵan deıin 2023 jyldyń sáýir jáne qarasha aılarynda qosymsha túzetýler engizilgenin jarııalaǵan segiz OPEK+ eli — atap aıtqanda, Qazaqstan, Saýd Arabııasy, Reseı, Irak, BAÁ, Kýveıt, Aljır jáne Oman — 2026 jyldyń 1 naýryzynda álemdik naryq jaǵdaılary men perspektıvalaryn qaraý úshin vırtýaldy kezdesý ótkizdi.
Qatysýshy elder 2023 jyldyń sáýirinde jarııalanǵan táýligine 1,65 mıllıon barrel kólemindegi qosymsha erikti túzetýlerdi kezeń-kezeńimen alyp tastaý týraly sheshim qabyldady jáne táýligine 206 000 barrel kólemindegi óndiristi túzetýge kelisti. Bul túzetý 2026 jyldyń sáýir aıynda engiziledi. Táýligine 1,65 mıllıon barrel naryq jaǵdaıynyń ózgerýine baılanysty ishinara nemese tolyqtaı qaıtarylýy múmkin.
Uıymnyń baspasóz habarlamasynda kvotalar «turaqty álemdik ekonomıkalyq boljam men munaı qorlarynyń tómendiginen kórinetin salaýatty naryqtyq negizderdi eskere otyryp» keńeıtiletini atalyp ótken.
Sáýir aıyna qajetti óndiris kestesi:
- Saýd Arabııasy — táýligine 10,166 mıllıon barrel;
- Reseı — táýligine 9,637 mıllıon barrel;
- Irak — táýligine 4,299 mıllıon barrel;
- BAÁ — táýligine 3,429 mıllıon barrel;
- Kýveıt — táýligine 2,596 mıllıon barrel;
- Qazaqstan — táýligine 1,579 mıllıon barrel;
- Aljır — táýligine 977 000 barrel;
- Oman — táýligine 816 000 barrel.
Elder yntymaqtastyq týraly deklaratsııany tolyq oryndaýǵa, sonyń ishinde óndiristi qosymsha erikti túrde túzetýge ujymdyq mindettemelerin rastady, olardy birlesken mınıstrlik monıtorıng komıteti (JMMC) baqylaıdy.
Olar sondaı-aq 2024 jyldyń qańtarynan bastap kez kelgen artyq óndiristi tolyǵymen óteıdi.
OPEK+ uıymynyń segiz eli naryqtyq jaǵdaı men perspektıvalardy qaraý úshin aı saıyn kezdesedi. Kelesi kezdesý 2026 jyldyń 5 sáýirinde ótedi.
Buǵan deıin, 2026 jyldyń 1 aqpanynda ótken vırtýaldy kezdesýden keıin OPEK+ elderi munaı óndirisin kóktemge deıin ózgerissiz qaldyrǵan bolatyn.
