Qazaqstan jáne Mysyr múftıi ortaq kelisimge qol qoıdy

NUR-SULTAN. QazAqparat - Qazaqstan musylmandary dinı basqarmasynyń tóraǵasy Naýryzbaı qajy Taǵanuly Mysyr Arab Respýblıkasyna jasaǵan resmı sapary barysynda Kaırdegi Pátýa berý ortalyǵynda bolyp, Mysyr múftıi Shaýqı Allammen kezdesti, dep habarlaıdy muftyat.kz.

Taraptar musylman úmbetin alańdatqan birqatar máseleni, atap aıtqanda ıpotekamen úı alý, dinı merekelerdi bekitý, óz elinde keń taraǵan mázhabty ustaný syndy jaǵdaıattardy talqylady. Múftıler osy baǵytta ortaq pátýa qabyldaýǵa ýaǵdalasty.

Qazaqstan jáne Mysyr múftıi ekijaqty áriptestik hám baýyrlastyq baılanysty arttyrý maqsatynda Qazaqstan musylmandary dinı basqarmasy men Mysyr Arab Respýblıkasynyń Pátýa berý ortalyǵy arasyndaǵy ǵylymı jáne dinı yntymaqtastyq týraly kelisimge resmı túrde qol qoıyp, ózara qujat almasty.

Atalǵan qujat eki tarapqa túrli dinı aǵymdar men pikirlerdi saraptap, zertteý júrgizýdi, zertteý jumysynyń qorytyndy pátýasyn shyǵarýdy mindettteıdi.

Sondaı-aq Mysyr tarapy Qazaqstannan jiberilgen ımamdar men ǵalymdarǵa pátýa shyǵarýdy, pátýa berý ádisin úıretýdi óz mindetine alady.

Kelisimge sáıkes taraptar oqý-aǵartý, kitap shyǵarý, biliktilikti kóterý, Islamǵa qatysty qate uǵymdarǵa der kezinde jaýap berý syndy birlesken jobalardy júzege asyrady.

Ortaq maqsatty oryndaý úshin Bas múftı Naýryzbaı qajy Taǵanulynyń tapsyrmasymen QMDB janynan jumys toby quryldy.