Qazaqstan jáne Majarstan prezıdentteri Alem.AI jasandy ıntellekt ortalyǵyn aralady
ASTANA. KAZINFORM — Qazaqstannyń Memleket basshysy Qasym-Jomart Toqaev pen Majarstan prezıdenti Tamash Shýıok Alem.AI halyqaralyq jasandy ıntellekt ortalyǵyn aralap kórdi, dep habarlaıdy Aqordanyń baspasóz qyzmeti.
Innovatsııalyq keńistik elimizdegi zamanaýı tehnologııalardy damytýǵa, daryndy jastardy qoldaýǵa, AI jáne ІT sektordaǵy perspektıvti jobalardy ilgeriletýge arnalǵan. Bul ekonomıkadaǵy tsıfrlyq salany jańa deńgeıge kóteredi.
Alem.AI Qazaqstannyń ǵana emes, basqa da elderdiń mamandaryn shoǵyrlandyratyn ortalyq bolmaq. Biregeı joba ǵylym, ónerkásip, kreatıvti ındýstrııa men memlekettik qyzmet kórsetý sekildi salalardaǵy tehnologııany damytýdy kózdeıdi.
Ortalyq ulttyq JI ekojúıesin qurýǵa, ınvestıtsııa tartýǵa, startaptar men zertteý qyzmetterin yntalandyrýǵa septigin tıgizedi.
Sondaı-aq otandyq JI sheshimderdiń eksportyn 2029 jylǵa qaraı 5 mıllıard dollarǵa deıin ulǵaıtýǵa múmkindik beredi. Jasandy ıntellektini damytý jańa tehnologııanyń paıda bolýyna jáne ekonomıkalyq ósimge yqpal etip, Astanany Ortalyq Azııadaǵy JI boıynsha jetekshi qalaǵa aınaldyrady.
Joba aıasynda jylyna túrli salada kózge túsken 10 myń daryndy jasty qoldaý, 1 myńǵa jýyq mamandy oqytý, 100-ge tarta startapty iske qosý, 10 shaqty ǵylymı zertteýdi júzege asyrý josparlanǵan.
Halyqaralyq ortalyq Tomorrow School jasandy ıntellekt mektebi, TUMO kreatıvti tehnologııalar ortalyǵy, startap-kampýs, ǵylymı-zertteý zerthanalary jáne GovTech sheshimderin ázirleýge arnalǵan AI-driven Government aımaǵy sekildi qoǵamdyq keńistikterdi biriktiredi.
Budan buryn Qazaqstan men Majarstan halyqaralyq deńgeıde birlese jumys isteýge keliskenin jazǵan edik.