Qazaqstan jáne Qytaı agrarlyq-tehnıkalyq ýnıversıtetteri stýdent almasýǵa kelisti
Atalǵan yntymaqtastyq jónindegi kelisimge Jáńgir han atyndaǵy Batys Qazaqstan agrarlyq-tehnıkalyq ýnıversıteti rektory N.Serǵalıev pen Soltústik Batys aýyl sharýashylyq, orman sharýashylyq ǵylym-tehnıka ýnıversıtetiniń rektory Sý Chı Shın qol qoıdy.
Memorandýmnyń basty maqsaty - ǵylymı-zertteý jáne bilim berý salasyndaǵy taraptardyń kezeńdik jáne júıeli túrde tájirıbe almasýyna jáne yntymaqtastyqqa járdemdesý bolyp tabylady.
Onyń aıasynda, professorlyq-oqytýshylar quramy, doktaranttar, magıstranttar men stýdentterdiń akademııalyq utqyrlyǵyn damytý jáne izdenýshilerge ǵylymı, pedagogıkalyq jáne zertteý taǵylymdamalarynan ótýge járdemdesý, almasý barysynda stýdentterdiń oqý úrdisinde alǵan kredıtterin ekijaqty taný, ózara múmkin bolatyn bilim berý baǵdarlamalaryn jáne eki dıplomdy bilim berýdi damytý úshin ýnıversıtetterdiń ǵylymı jáne bilim berý múmkinshilikterin paıdalaný jáne t.b. mindetter kózdelýde.
Sondaı-aq, bilim berý men ǵylymnyń ózekti máseleleri boıynsha birlesken sımpozıýmdar, halyqaralyq ǵylymı-praktıkalyq konferentsııalar men semınarlar uıymdastyrý, ortaq ǵylymı-zertteý baǵdarlamalary men jobalardy qolǵa alý josparlanýda.
Kelisimniń basymdyqqa ıe baǵyttaryna birlesken ǵylymı-zertteý uıymdaryn uıymdastyrý arqyly jańa tehnıka men tehnologııalardy ıgerip, ınnovatsııalyq kásiporyndar jáne oqý men ádebıettermen almasý úshin birlesken avtorlyq ujymdar qurý jatady.
Aıta keteıik, «Jazken Jıembaev atyndaǵy Qazaq ósimdik qorǵaý jáne karantın ǵylymı-zertteý ınstıtýty» JShS bas dırektory A.Saǵıtov bastaǵan Qazaqstannyń agrotehnıkalyq ýnıversıtetteriniń jetekshileri men aýyl sharýashylyǵy mamandarynan quralǵan arnaıy top ústimizdegi jyldyń 23 qarashasynan beri QHR aýmaǵyndaǵy aýyl sharýashylyǵynyń eń basty óndiristik keshenderi men salalyq oqý oryndarynyń jumystarymen tanysýda.