Qazaqstan jáne Qyrǵyzstan TJ mınıstrlikteri yntymaqtastyqty nyǵaıtý týraly kelisimge keldi
NUR-SULTAN. QazAqparat - Almaty qalasynda Qazaqstan Respýblıkasynyń Tótenshe jaǵdaılar mınıstri ıÝrıı Ilınniń tóraǵalyǵymen Tótenshe jaǵdaılardy jáne zilzalalardyń qaýip-qaterin azaıtý ortalyǵynyń toǵyzynshy keńes otyrysy ótti, dep habarlaıdy QazAqparat QR TJM baspasóz qyzmetine silteme jasap.
Keńes otyrysyna Qyrǵyzstan Respýblıkasynyń Tótenshe jaǵdaılar mınıstri Boobek Ajıkeev jáne Aýǵanystan Islam Respýblıkasy Elshiliginiń ýaqytsha senimdi ókili Azızýlla Omar qatysty. Bul týraly QR TJM resmı ókili Talǵat Ýálı habarlady.
Ekijaqty kezdesý aıasynda Qazaqstan jáne Qyrǵyzstan tótenshe jaǵdaılar mınıstrlikteriniń basshylary azamattyq qorǵaý salasyndaǵy yntymaqtastyqty nyǵaıtý máselelerin talqylady.
Kezdesý barysynda Aýǵanystan tarapy da ortalyqqa tolyq quqyly múshe retinde kirýge ázirligin kezekti ret rastady.
Otyrysta azamattyq qorǵaý salasyndaǵy jobalardy halyqaralyq uıymdarmen birlesip iske asyrý barysy da sóz boldy.
Keńes músheleri ortalyq qatysýshylarynyń quramyn odan ári keńeıtýdi, onyń áleýetin tıimdi qoldanýdy jáne tótenshe jaǵdaılarǵa jedel áreket etý ázirligin kúsheıtýdi usyndy.
Otyrys qorytyndysy boıynsha ortalyq keńesiniń ortaq sheshimine qol qoıyldy.
Keıin eki eldiń tótenshe jaǵdaılar mınıstrleri Almaty qalasy TJD ahýaldyq ortalyǵynyń jumysymen tanysty. Onda birqatar ınnovatsııalyq tsıfrlyq jobalardyń derekqory ornalasqan. Atap aıtqanda, onlaın rejımdegi selden qorǵaý monıtorıngtik júıesi men qala boıynsha órt oshaqtaryn anyqtaıtyn beınebaqylaý kameralaryn kórdi.
Sonymen qatar, jer silkinisin aldyn ala eskertý men baqylaý júıelerin ıntegratsııalandyrý qajettigin atap ótti.
