Qazaqstan jáne Qytaı Alataý qalasyn damytýǵa arnalǵan Smart city ınstıtýtyn qurady
ALMATY. KAZINFORM — Prezıdent janyndaǵy Ulttyq ǵylym akademııasynyń (UǴA) janynan qytaılyq akademıktermen birlesip Alataý qalasyn damytýǵa arnalǵan Smart city ınstıtýty qurylmaq.
UǴA málimetinshe, Qytaı ǵylym akademııasynyń qoldaýymen Qazaqstan–Qytaı birlesken aqyldy qalalardy zertteý ınstıtýtyn (Smart City Joint Research Institute) qurý baǵytyndaǵy yntymaqtastyq damyp keledi. Osy bastama aıasynda QR Prezıdentiniń janyndaǵy Ulttyq ǵylym akademııasy, Alatau City Authority, Shenchjen ýnıversıtetiniń Aqyldy qalalar ǵylymı-zertteý ınstıtýty jáne LAY-OUT Planning Consultants Co., Ltd. kompanııasy arasynda tórtjaqty yntymaqtastyq týraly kelisimge qol qoıyldy.
Yntymaqtastyqqa qatysýshylardyń árqaısysy óz quzyreti sheńberinde úles qospaq. Máselen, Shenchjen ýnıversıtetiniń Aqyldy qalalar ǵylymı-zertteý ınstıtýty tsıfrlyq egizder, geokeńistiktik tehnologııalar, zattar ınterneti (IoT) jáne qalany zııatkerlik basqarý júıeleri salasynda ǵylymı ázirlemeler júrgizedi. Al QR Ulttyq ǵylym akademııasy ǵylymı jáne strategııalyq basshylyqty, sondaı-aq Qazaqstannyń ǵylymı uıymdarymen ózara is-qımyldy qamtamasyz etedi.
— Bolashaq ınstıtýttyń negizgi mindeti — ǵylymı zertteýlerdi, tehnologııalyq ázirlemelerdi jáne zamanaýı qalalardy damytýdaǵy praktıkalyq tájirıbeni biriktirip, zııatkerlik sheshimderdi Qazaqstan jaǵdaıyna beıimdeý jáne engizý, — dep habarlady akademııadan.
Búginde Alataý qalasy birlesken zertteý nátıjelerin synaqtan ótkizýge arnalǵan pılottyq alań retinde aıqyndalǵan. Munda qalany josparlaý, salý jáne basqarý úderisterine tsıfrlyq tehnologııalardy bastapqy kezeńderden bastap engizýdi kózdeıtin Digital-Native tásilin damytý josparlanyp otyr.
Basym baǵyttar retinde tsıfrlyq egizder, jasandy ıntellekt, zııatkerlik kólik ınfraqurylymy, qalany tsıfrlyq basqarý, zattar ınterneti, birlesken ǵylymızertteýler jáne mamandar daıarlaý qarastyrylyp jatyr.
— Bul ınstıtýt bilim men tájirıbe almasýǵa, Smart City tehnologııalaryn ázirleýge jáne beıimdeýge arnalǵan halyqaralyq zertteý platformasyna aınalýdy maqsat etedi. Bul tehnologııalardy bolashaqta Qazaqstanda ǵana emes, Ortalyq Azııa elderinde de qoldaný múmkindigi qarastyrylady, — dep habarlady UǴA baspasóz qyzmeti.
Eske salaıyq, buǵan deıin Alataý qalasynyń tsıfrlyq egizin jasaýǵa ońtústikkoreıalyq kompanııalar kómektesetinin jazǵanbyz.