Qazaqstan jáne Kıpr prezıdentteri shaǵyn quramda kelissóz júrgizdi
ASTANA.KAZINFORM - Táýelsizdik saraıynda elimizge resmı saparmen kelgen Kıpr Respýblıkasynyń Prezıdentin resmı qarsy alý rásimi ótti. Bul týraly Aqorda habarlady.
Іs-shara aıasynda Qasym-Jomart Toqaev pen Nıkos Hrıstodýlıdıs bir-birine resmı delegatsııa múshelerin tanystyrdy.
Qazaqstan jáne Kıpr prezıdentteri shaǵyn quramda kelissóz júrgizdi.
– 2019 jyly Syrtqy ister mınıstri laýazymyn atqaryp júrgenińizde elimizge kelip, Qazaqstannyń Eýropa Odaǵyndaǵy senimdi dosy ári qoldaýshysy retinde áreket etetinińizdi málimdegen edińiz. Búginde biz aıtarlyqtaı nátıjege qol jetkizdik dep senimmen aıtýǵa bolady. Memleketterimizdiń astanalarynda elshilikterimizdi ashtyq. Eki el arasynda tikeleı áýe reısi iske qosyldy, basqa da birqatar mańyzdy joba júzege asyryldy. Degenmen ekijaqty yqpaldastyqty keńeıtý úshin áleýetimiz jetkilikti dep oılaımyn. Óz tarapymnan kóptegen baǵytta yntymaqtastyǵymyzdy odan ári damytýǵa kúsh salýǵa daıynmyn, - dedi Qasym-Jomart Toqaev.
Nıkos Hrıstodýlıdıs búgingi kelissózder ózara yntymaqtastyqty arttyrýǵa septigin tıgizedi dep sanaıtynyn atap ótti.
– Sizdiń elińizge Kıprden tikeleı qatynaıtyn alǵashqy reıs arqyly iskerlik delegatsııa ókilderimen birge ushyp kelgenime óte qýanyshtymyn. Elderimizdiń áleýeti mol. Búgingi kelissózder ózara yntymaqtastyqty arttyrýǵa septigin tıgizedi dep sanaımyn. Sondaı-aq Qazaqstanǵa basqa laýazymda kelip otyrmyn. Qazirgi ýaqytta elimiz Eýropa Odaǵy Keńesine tóraǵalyq etip jatyr. Atalǵan óńirdiń mańyzyn jáne Qazaqstannyń erekshelikterin eskere otyryp, Eýropa Odaǵy men Qazaqstan arasyndaǵy yqpaldastyqty odan ári ilgeriletý joldaryn talqylaýǵa ázirmin.
Elordada Kıpr Prezıdenti Nıkos Hrıstodýlıdıstiń Qazaqstanǵa alǵashqy resmı sapary bastalǵanyn jazǵan bolatynbyz.
