«Qazaqstan» jáne «Kazsport» telearnalary maýsym aıynda mańyzdy sporttyq sharalardy tikeleı efırde kórsetedi
ASTANA. QazAqparat - «Qazaqstan» jáne «Kazsport» telearnalary maýsym aıynda birqatar tartymdy sporttyq sharalardy tikeleı efırden kórsetedi, dep habarlaıdy «Qazaqstan» RTRK baspasóz qyzmetinen.
Atap aıtqanda, 12 maýsym kúni Almaty qalasynyń Ortalyq stadıonynda EURO-2016 irikteý matchyna Qazaqstan men Túrkııanyń Ulttyq quramalary arasynda kezdesý ótedi. Bul Qazaqstan men Túrkııanyń osymen altynshy kezdesýi. «Qazaqstan» telearnasy osy oıyndy tikeleı efırde saǵat 21.40-ta kórsetedi.
Al 6 maýsym kúni Ońtústik Afrıka Respýblıkasynyń Kempton Park qalasynda IBO tujyrymdamasy boıynsha kásipqoı bokstan ortasha aýyr salmaq dárejesinde Álem chempıony ataǵy úshin ońtústikafrıkalyq Tomas Ýstýızen men jańazelandııalyq Robert Berrıdj arasyndaǵy jekpe-jek ótedi. Atalmysh boks keshiniń aıasynda sharshy alańǵa shyǵatyn bylǵary qolǵap sheberleri arasynda 21 jasar qazaqstandyq Roman Jaılaýov ta bar. Ol óziniń kásipqoı rıngtegi 15-shi kezdesýin ońtústikafrıkalyq Lýıanda Jakoǵa qarsy ótkizedi. Segiz raýndtan turatyn reıtıngtik bul jekpe-jek Jaılaýov úshin sheberligin shyńdaýǵa berilgen taǵy bir múmkindik. Buǵan deıingi ótkizgen 14 kezdesýdiń 8-in talantty qazaqstandyq nokaýtpen aıaqtaǵan bolatyn. Roman Jaılaýovtyń Lýıanda Jakoǵa qarsy jekpe-jegin 6 maýsymda «Kazsport» telearnasy 23.30-da tikeleı efırde kórsetedi.
12-14 maýsym kúni «Kazsport» telearnasy voleıboldan ulttyq quramalar arasynda ótkiziletin jyl saıynǵy dástúrli Álemdik lıga oıyndarynan kórsetilimder serııasyn bastaıdy. Aıta keteıik, bıyl Qazaqstan erler quramasy Álemdik lıgaǵa alǵash ret qatysqaly otyr. Bizdiń sportshylarymyz jarys jolyn úshinshi dıvızıondaǵy toptyq kezeńnen bastamaq. Olardyń qarsylastary Mysyr, Venesýela jáne Ispanııa komandalary bolady.
Týrnırdiń birinshi kezeńi 12-14 maýsym aralyǵy Taraz qalasyndaǵy «Taraz-Arena» sport kesheninde ótedi. Matchtar Astana ýaqyty boıynsha saǵat 14.50-de jáne 18.20-da bastalady. Ekinshi kezeń 19-21 maýsym aralyǵynda Mysyr astanasy Kaır qalasyna josparlanǵan. Álemdik dıvızıonnyń Qazaqstan quramasy qatysatyn barlyq kezdesýlerin «Kazsport» telearnasy tikeleı efırde kórsetýdi josparlaýda.
Álemdik lıga - erler quramalary arasynda 1990 jyldan bastap jyl saıyn ótkiziletin halyqaralyq iri kommertsııalyq týrnır. Bul jylǵy jarystyń fınaldyq kezeńi 18-19 shilde kúnderi Brazılııanyń Rıo-de-Janeıro qalasynda ótedi.
