«Qazaqstan» jáne «Kazsport» telearnalary qazaqstandyq fýtbol klýbtarynyń ızraıldiktermen jáne slovenııalyqtarmen kezdesýlerin kórsetedi
ASTANA. QazAqparat - «Qazaqstan» teleradıokorporatsııasy sport jankúıerlerine jáne eýropalyq fýtbol jarysynda qazaqstandyq klýbty qoldaıtyndarǵa syılyq jasamaqshy.
Eýrokýboktyń qonaq matchyn kórsetý týraly sheteldik seriktestermen kelisimge qol jetkizildi.
Qazaqstandyq jáne ızraıldik fýtbol klýbtary 9 shilde kúni eýropa Lıgasynyń birinshi bilikti raýndy sheńberinde Ierýsalımde kezdesý ótkizedi.
Alańda «BEITAR» (Izraıl-Ierýsalım) jáne «ORDABASY» (Qazaqstan-Shymkent) baq synasady. Astana ýaqyty boıynsha 22.50-de «Kazsport» telearnasy oıyndy tikeleı efırde kórsetedi, al 10 shilde kúni osy telearnada saǵat 10.00 jáne 22.00-de tikeleı efırde kóre almaǵan jankúıerler úshin oıynnyń qaıtalaýy bolady.
Esterińizge sala keteıik, bul qarsylastar arasyndaǵy ekinshi match bolmaqshy. 2 shilde kúni quramalar Shymkentte ózara kezdesý ótkizgen bolatyn. Match 0:0 esebimen aıaqtaldy.
15 shildede (shildeniń 14-nen 15-ne qaraǵan túni) saǵat 00.30-da «Qazaqstan» ulttyq telearnasy elordalyq «Astana» men Slovenııanyń «Marıbor» fýtbol klýby arasynda ótetin kezdesýdi tikeleı efırde kórsetse, 15 shildede «Kazsport» telearnasy saǵat 10.00 jáne 22.00-de tikeleı efırde kóre almaǵan jankúıerler úshin oıynnyń qaıtalaýyn uıymdastyrady, dep habarlaıdy «Qazaqstan» teleradıosynyń baspasóz qyzmeti.
