«Qazaqstan» jáne «KAZsport» arnalary Eýro-2016 irikteý matchtaryn tikeleı efırde kórsetedi
ASTANA. QazAqparat - Aldaǵy jeksenbi, 9 qyrkúıekte bastalatyn fýtboldan Eýropa chempıonatynyń 15-shi týrnırine irikteý kezeńin «Qazaqstan» jáne «KAZsport» arnalary tikeleı efırde translıatsııalaıtyn bolady. Bul týraly búgin ótken baspasóz máslıhatynda «Qazaqstan» RTRK AQ Basqarma tóraıymy Nurjan Muhamedjanova aıtty.
«Fýtbol elimizde ǵana emes, búkil álemde nómiri birinshi sport túri bolǵandyqtan, Eýro-2016 týrnıriniń irikteý matchtary kórermenderimizdi qyzyqtyratyny belgili. Sondyqtan bizdiń osy oıyndardyń barlyǵyn tikeleı efırden kórsetý múmkindigine qol jetkizýimiz úlken mártebe dep oılaımyn», - dedi ol.
Al QR Fýtbol federatsııasynyń birinshi vıtse-prezıdenti Allen Chaıjýnýsovtyń aıtýynsha, barlyq matchtardy translıatsııalaý ruqsatyn alý jumystary mamyrdan bastalyp, búginge deıin jalǵasqan.
«Bul biz úshin úlken jetistik. Sondyqtan da osy iste qol ushyn sozyp, kómek kórsetken «Qazaqstan» jáne «KAZsport» arnalarynyń basshylaryna alǵysymyz sheksiz», - dep atap ótti A.Chaıjýnýsov.
Aıta keteıik, «Qazaqstan» jáne «KAZsport» telearnalary 9 qyrkúıekte «Astana-Arena» stadıonynda ótetin Qazaqstan-Latvııa matchyn tikeleı efırde translıatsııalaıdy.
