Qazaqstan jáne Kanada: keleshegi mol yntymaqtastyq
NUR-SULTAN. QazAqparat - Qazaqta «jyl degen at basyn burǵansha» degen maqal bar. Bul sózdi Qazaqstan jáne Kanada Іskerlik keńesi (QKІK) týrasynda aıtatyn bolsaq, tórt jarym jyl ishinde aıtarlyqtaı jetistikterge qol jetkizilgenin kórýge bolady. Bul ózgerister Qeńestiń 2020 jyldyń qarasha aıynyń sońyńda onlaın formatta ótken jyl saıynǵy 4-shi otyrysynda aıqyn sezilip turdy. «Cameco Corporation» kompanııasynyń bas dırektory jáne QKІK-tiń teń tóraǵasy retinde bizdiń Іskerlik keńestiń ósip, alǵa basýyna kýá bolý men úshin erekshe qýantarlyq jaǵdaı ekenin atap ótkim keledi. Bul týraly «Cameco» korporatsııasynyń (Kanada) bas dırektory Tım Gıttsel aıtty, dep habarlaıdy QazAqparat.
«QKІK-tiń bıylǵy jyly ótken otyrysyna memlekettik organdardyń, iskerlik toptardyń, sheteldik uıymdar men qaýymdastyqtardyń, ǵylymı qoǵamdastyqtardyń 700-den astam ókili jáne Qazaqstan men Kanadanyń kóptegen sarapshylary qatysty.
QKІK-tiń 2016 jyly ótken alǵashqy otyrysynda ekijaqty saýda kólemin arttyrý, Qazaqstan men Kanada arasyndaǵy yntymaqtastyqty keńeıtý úshin birqatar máseleni sheshý, baılanystar ornatý jáne bıznesti damytý úshin berik platforma jasaý, jeke sektordaǵy yntymaqtastyqty nyǵaıtý jónindegi mańyzdy máselelerge eki el úkimetterindegi sheshim qabyldaıtyn tulǵalardyń nazaryn aýdarý úshin qajetti alań qurý sııaqty birneshe naqty maqsat alǵa qoıylǵan bolatyn», - deıdi ol.
T.Gıttsel buǵan qol jetkizgenine qýanyshty ekenin atap ótti.
«Biz búgin ózara is-qımyldyń barlyq salalarynda aıtarlyqtaı ilgerileýshilik baıqap otyrmyz. Otyrys barysynda talqylanǵan taqyryptar turǵysynan serpindi jáne jańashyl bolǵan jumys toptary teń tóraǵalarynyń esepteri jaǵymdy áser qaldyrdy. Sońǵy birneshe jyl ishinde elderimiz arasynda uzaq merzimdi ózara tıimdi qatynastar qalyptasty. Bul bizdiń alǵa qoıǵan alǵashqy maqsatymyz bolatyn.
Men sondaı-aq Qazaqstan men Kanada úkimetteri birlesken jumys jasaýǵa eleýli múmkindikteri bar elderimiz arasyndaǵy saýda qatynastaryn damytýǵa úlken qyzyǵýshylyq tanytyp otyrǵanyna kámil senemin.
Eki elshimiz – Ottavadaǵy Aqylbek Qamaldınov pen Nur-Sultandaǵy Nıkolıa Brýsso bizdi belsendi qoldaıtynyn jáne elderimizdiń arasyndaǵy qarym-qatynastardyń damýyna zor úles qosatynyn atap ótkim keledi.
Bıyl Qazaqstan Táýelsizdiginiń 29 jyldyǵyn atap ótýde. Bul el men úshin iskerlik turǵydan da, jeke turǵydan da erekshe mańyzǵa ıe. Al meniń Qazaqstanmen jáne onyń tamasha adamdarymen qarym-qatynasym 25 jyl boıy jalǵasýda», - deıdi ol.
Onyń aıtýynsha, Qazaqstanmen yntymaqtastyqta bolǵan kezeń ishinde «Cameco» kompanııasy qazaqstandyq seriktes «Qazatomprom» kompanııasymen «Inkaı» ýran kenishin ıgerý jónindegi birlesken kásiporyn arqyly Qazaqstan ekonomıkasyna jarty mıllıard AQSh dollarynan astam ınvestıtsııa quıǵan.
«Cameco» kompanııasy «Qazatomprom» sııaqty álemdegi ýran óndiretin asa iri tabysty kompanııalardyń qatarynda. Men Qazaqstannyń sońǵy jyldardaǵy alǵa ilgerileýine kýá bolǵanyma qýanyshtymyn. Jaqynda men Qazaqstan Prezıdenti janyndaǵy Sheteldik ınvestorlar keńesiniń 33-shi plenarlyq májilisine qatysý mártebesine ıe boldym. Prezıdent Qasym-Jomart Toqaev eldiń álemdik ekonomıkadaǵy ornyn nyǵaıtý boıynsha júrgizilip jatqan jumystar jóninde baıandady. Onyń basshylyǵymen Qazaqstan tehnologııalyq, áleýmettik jáne basqa da jetistikter arqyly eýrazııalyq keńistikte kóshbasshy el bolýǵa tyrysýda. Tsıfrlandyrý, jasandy ıntellekt, munaı-gaz, tabıǵı resýrstar, aýyl sharýashylyǵy, densaýlyq saqtaý, kólik – osy baǵyttaǵy negizgi basymdyqtar. Osy baǵyttardyń barlyǵy Qazaqstan jáne Kanada Іskerlik keńesiniń jumys toptarynda talqylandy.
Prezıdent Q. Toqaev qozǵaǵan máselelerdiń kópshiligi negizinen, Qazaqstannyń jahandyq kompanııalarmen jáne sheteldik memlekettermen quratyn qatynastaryna baılanysty bolmaq. Qazaqstan men Kanada arasynda dál osyndaı qatynastar qalyptasqan.
Ótken jyldary biz Qazaqstan men Kanada arasyndaǵy baılanystardyń kóptegen salalarda nyǵaıýynyń kýási boldyq. Buǵan kóbine eki memlekettiń tıisti elshilikteri jasaǵan eńbekteri áser etti.
Biz «Cameco» kompanııasy elderimiz arasyndaǵy osy mańyzdy qarym-qatynastyń bir bóligi ekendigimizdi maqtan tutamyz.
Sondyqtan, men «Cameco» kompanııasynyń atynan jáne óz atymnan Qazaqstandy el Táýelsizdiginiń 29 jyldyǵymen quttyqtaımyn jáne izgi tilekterimdi bildiremin», - dep túıindedi ol.
