Qazaqstan jáne EO áýe qatynastaryn jolǵa qoıý máselelerin talqylady

NUR-SULTAN. QazAqparat –Qazaqstan Respýblıkasy Syrtqy ister mınıstriniń orynbasary Marǵulan Baımuhannyń jáne Eýropalyq syrtqy is-qımyldar qyzmetiniń Reseı, Shyǵys áriptestik, Ortalyq Azııa jáne EQYU boıynsha dırektory Lıýk Devınniń tóraǵalyǵymen beınekonferentsııa rejıminde «Qazaqstan Respýblıkasy – Eýropalyq Odaq» Yntymaqtastyq komıtetiniń 18-shi otyrysy ótti, dep habarlaıdy QazAqparat QR SІM baspasóz qyzmetine silteme jasap.

Qazaqstandyq delegatsııa quramyna Saýda jáne ıntegratsııa, Energetıka, Indýstrııa jáne ınnovatsııalyq damý, Ulttyq ekonomıka mınıstrlikterin qosa alǵanda, QR toǵyz memlekettik organynyń ókilderi kirdi.

Kelissózderdiń basty taqyryptary 2020 jylǵy 1 naýryzda kúshine engen Keńeıtilgen áriptestik pen yntymaqtastyq týraly kelisimi (KÁYK) sheńberinde Qazaqstan men Eýropalyq odaqqa múshe elder arasyndaǵy saıası dıalogty, kópjaqty saýda-ekonomıkalyq jáne ınvestıtsııalyq qatynastardy nyǵaıtý máseleleri boldy.

Beınekonferentsııa barysynda QR men EO arasyndaǵy saýda, energetıka, qorshaǵan ortany qorǵaý, aýyl sharýashylyǵy jáne adam quqyqtary salasyndaǵy dıalogtyq platformalar jelisi boıynsha buryn qol jetkizilgen ýaǵdalastyqtardy iske asyrý jóninde naqty pikir almasyldy. Sondaı-aq Qazaqstan men Eýropalyq odaq arasyndaǵy áýe qatynastaryn jolǵa qoıý jáne QR azamattary úshin vızalyq rejımdi jeńildetý máseleleri talqylandy.

Taraptar «Ortalyq Azııa – Eýropalyq odaq» kezdesýleri sheńberinde óńiraralyq yntymaqtastyqty ilgeriletý, sondaı-aq Eýroodaqtyń Ortalyq Azııa boıynsha jańa strategııasy aıasynda jańa óńirlik jobalardy ázirleý jáne iske asyrý máselelerine erekshe nazar aýdardy.

Kezdesý qorytyndysynda taraptar Qazaqstan – EO jáne Ortalyq Azııa – EO jelisi boıynsha aldaǵy kezdesýler sheńberinde qaralǵan máseleler boıynsha ózara is-qımyldy jalǵastyrýǵa kelisti.

2020 jylǵy qańtar-shilde aralyǵyndaǵy taýar aınalymy 13,8 mlrd AQSh dollaryn qurady. Tikeleı sheteldik ınvestıtsııalar 2020 jyldyń birinshi toqsanynda 1,72 mlrd AQSh dollaryna jetti. Qazirgi ýaqytta Qazaqstanda eýropalyq qatysýmen 4 myńnan astam kompanııa jáne 2 myńnan astam birlesken kásiporyn tirkelgen. Jalpy somasy 641 mln AQSh dollaryna 17 iske asyrylǵan joba, sondaı-aq EO elderiniń ınvestorlarynyń qatysýymen iske asyrylatyn jáne pysyqtalatyn jalpy somasy 8,8 mlrd AQSh dollaryn quraıtyn 37 ınvestıtsııalyq joba bar.