Qazaqstan jáne Belarýs teńdestirilgen saýda júrgizedi
ASTANA. QazAqparat - Qazaqstan jáne Belarýs ózara saýda kóleminiń azaıýyna jol bermeý úshin barlyq sharalardy júzege asyrady, dep habarlaıdy pm.kz.
«Qazaqstan men Belarýs arasyndaǵy seriktestik árdaıym saýda-ekonomıkalyq yntymaqtastyqtyń turaqty jáne strategııalyq sıpatymen erekshelendi. Biraq, Eýrazııalyq keńistik sheńberindegi ózara tyǵyz árekettestikke jáne ıntegratsııaǵa qaramastan, 2015 jyly bizdiń elderimizdiń arasyndaǵy saýda kólemi 38%-ǵa tómendedi», - dep habarlady Qazaqstan Premer-Mınıstriniń birinshi orynbasary Baqytjan Saǵyntaev Gomeldegi Qazaqstan-Belarýs saýda-ekonomıkalyq yntymaqtastyǵy jónindegi úkimetaralyq komıssııasynyń otyrysy barysynda.
Qazaqstandyq statıstıkanyń málimetinshe, 2015 jyly Belarýspen taýar aınalymy kólemi 520 mln AQSh dollaryn qurap, 37,7%-ǵa tómendedi.
B. Saǵyntaevtyń aıtýynsha, saýdanyń teris dınamıkasy birinshi kezekte álemdegi ekonomıkalyq ahýaldyń nasharlaýyna jáne energııa resýrstaryna baǵanyń tómendeýine baılanysty.
«Sonymen birge, taýar aınalymynyń kólemin qoldaýda saýdanyń úılestirilgendigi jáne jetkiziletin taýardyń turaqty sıpaty mańyzdy ról atqarady. Osyǵan baılanysty, eki memlekettiń ýákiletti memlekettik organdaryna teńdestirilgen saýdany qalyptastyrý jáne taýarlardy turaqty jetkizýdi qamtamasyz etý máselesin birlesip zertteýdi tapsyrýdy usynamyn», - dedi Qazaqstan Premer-Mınıstriniń birinshi orynbasary Úkimetaralyq komıssııa otyrysy barysynda.
