Qazaqstan jáne BAÁ karate federatsııalary memorandýmǵa qol qoıdy
ASTANA. KAZINFORM — Búgin Fýdjaıra qalasynda Qazaqstan men Birikken Arab Ámirlikteriniń karate federatsııasy yntymaqtastyq jóninde memorandýmǵa qol qoıdy.

Qazaqstan karate federatsııasynyń baspasóz qyzmeti málim etkendeı, taraptar arasyndaǵy jıynǵa Qazaqstan karate federatsııasynyń vıtse-prezıdenti Bolat Havlahat, BAÁ-niń karate federatsııasynyń prezıdenti, general-maıor Nasser Ál-Razýkı men Qazaqstannyń Dýbaı qalasyndaǵy Bas konsýly Almaz Tasbolat qatysty.
Taraptar biraz pikir almasqannan keıin Bolat Havlahat pen Azııa karate federatsııasynyń vıtse-prezıdenti Rashıd ál-Álı myrza mańyzdy qujatqa qol qoıdy.

Osydan soń Halyqaralyq karate federatsııasy vıtse-prezıdenti, Azııa karate federatsııasynyń prezıdenti qyzmetin qosa atqaratyn Nasser Ál-Razýkı baspasóz jıynynda sóz sóıledi. Ol bul kelisim karate sportyn eki elde jańa deńgeıge kóterýge jol ashatynyna senim bildirdi. Ári Qazaqstan karate sportshylarynyń aıtýly jetistikteri men federatsııasynyń qarqyndy jumysyn atap ótip, joǵary baǵa berdi.
Óz kezeginde Bolat Havlahat Nasser Ál-Razýkı myrzaǵa «QR-nyń Qurmetti sport qyzmetkeri» tósbelgisin tabystady.
Jastar arasyndaǵy A serııasyndaǵy týrnır aıasynda júzege asqan bul is aldaǵy ýaqytta Ulttyq quramalardyń birlesken oqý-jattyǵý jıyndaryn kóptep ótkizýine jol ashady.
Esterińizge sala keteıik, osyǵan deıin Dinmuhammed Aıdarbek Fujairah Open týrnıriniń jeńimpazy atanǵanyn jazǵan bolatynbyz.