Qazaqstan jáne Ázerbaıjan prezıdentteri Geıdar Álıev atyndaǵy kósheniń saltanatty ashylý rásimine qatysty
Memleket basshysy byltyr Ázerbaıjanǵa resmı sapary barysynda Ilham Álıevpen mádenı-gýmanıtarlyq yntymaqtastyqty nyǵaıtý jóninde kelisimge kelgenin eske salyp, bul, eń aldymen, eki eldiń dostyq qarym-qatynasyn bekemdeı túsý úshin óte mańyzdy qadam ekenin aıtty.
– Geıdar Álıev sekildi álemdik deńgeıdegi tulǵanyń atyn ulyqtaý – bizdiń paryzymyz. Astanada onyń esimimen atalǵan jańa kósheniń ashylýy – bizdiń osy ıgi iske qosqan mańyzdy úlesimiz. Ázerbaıjan halqynyń uly perzentine degen zor iltıpatymyz ári shynaıy qurmetimiz, – dedi Qasym-Jomart Toqaev.
Prezıdent óz sózinde Geıdar Álıevtiń kúrdeli kezeńde el bıligin qolǵa alyp, Ázerbaıjannyń memlekettiligin nyǵaıtýda zor ról atqarǵanyn atap ótti.
– «Geıdar» esimi «aldyńǵy shepte júrýshi» degen maǵyna beredi. Munyń sımvoldyq máni bar. Ony qazirgi qarqyndy damý jolyna túsken Ázerbaıjannyń arhıtektory desek, artyq aıtqandyq emes. Onyń salıqaly basshylyǵymen Ázerbaıjanda eleýli saıası jáne áleýmettik-ekonomıkalyq ózgerister jasaldy. El qıyn kezeńderdi eńserip, damýdyń dańǵyl jolyna tústi. Álemdik qoǵamdastyqtyń bedeldi múshesi boldy. Shyn máninde, Geıdar Álıev esimi Ázerbaıjannyń naǵyz brendine aınaldy. Onyń ómir joly – ultqa adal qyzmet etýdiń jarqyn úlgisi, – dedi Memleket basshysy.
Budan bólek, Qasym-Jomart Toqaev Geıdar Álıevtiń Qazaqstan men Ázerbaıjan arasyndaǵy ekijaqty qarym-qatynasty nyǵaıtýǵa ólsheýsiz úles qosqanyna toqtaldy. Sondaı-aq onyń qazaqtar týraly jyly pikir bildirip qana qoımaı, túp-tamyrymyz ben tarıhı muramyz ortaq ekenin únemi aıtyp otyratynyn eske aldy.
Sonymen qatar Memleket basshysy búgingi Qazaqstan men Ázerbaıjan arasyndaǵy qarym-qatynas berik ári úılesimdi, strategııalyq seriktestik pen odaqtastyq rýhynda damyp kele jatqanyna nazar aýdardy.
Óz kezeginde Ázerbaıjan Prezıdenti Ilham Álıev bizdiń elimizge resmı sapary aıasynda osyndaı keremet tarıhı sátke kýá bolyp otyrǵanyna qýanyshty ekenin jetkizip, Geıdar Álıevtiń táýelsiz Ázerbaıjan memleketiniń qalyptasýyndaǵy tarıhı róline toqtaldy.
– Qasym-Jomart Kemeluly Geıdar Álıevtiń baýyrlas qazaq halqyna degen yqalasy men súıispenshiligi erekshe bolǵanyn aıtty. Rasynda, solaı. Men buǵan kýámin. Ol qazaqtardyń salt-dástúrin, mádenıetin jaqsy biletin jáne kóp ǵasyrlyq tarıhyna qurmetpen qaraıtyn. Ol qazaqtar men ázerbaıjan halqynyń baýyrlastyǵyn joǵary baǵalady. Sondaı-aq ol túrki álemin odan ári biriktirý úshin qolynan kelgenniń bárin jasady. Biz búgin túrki áleminiń birigip, halyqaralyq arenada bedeldi jáne ıe qýatty uıym qurǵanyna kýá bolyp otyrmyz. Bul – Geıdar Álıevtiń de eńbeginiń jemisi, – dedi Ázerbaıjan Prezıdent.
Sonymen qatar Ilham Álıev Qazaqstan Prezıdenti men halqyn áleýmettik-ekonomıkalyq damý jetistikterimen quttyqtap, elimizdiń halyqaralyq arenadaǵy bedeli zor ekenin atap ótti.
Saltanatty rásimnen keıin Qasym-Jomart Toqaevtyń qatysýymen Ázerbaıjan Prezıdenti Ilham Álıev Astana qalasyndaǵy Botanıkalyq baqta aǵash otyrǵyzdy.
