Qazaqstan jáne Aýǵanstan UOK ókilderi kezdesti
ASTANA.KAZINFORM - Qazaqstan Ulttyq Olımpıadalyq komıtetinde QR UOK Bas dırektory Nurlan Nógerbek pen Aýǵanstan UOK Bas hatshysy Muhammad ıÝnýs Popalzaıdyń resmı kezdesýi ótti.
Taraptar jattyqtyrýshylar quramyn daıarlaý jáne túrli bilim berý bastamalaryn júzege asyrý máselelerin talqylady.
Atap aıtqanda, kezdesý barysynda 17-22 maýsym aralyǵynda Astanada ótip jatqan jattyqtyrýshylarǵa arnalǵan tehnıkalyq kýrstarǵa erekshe nazar aýdaryldy. Atalǵan baǵdarlamany Qazaqstan UOK uıymdastyryp otyr. Mamandardyń biliktiligin arttyrý HOK-tyń Olympic Solidarity baǵdarlamasynyń qoldaýymen, sondaı-aq UWW jáne World Boxing halyqaralyq federatsııalarymen birlesip júzege asyrylýda.
QR UOK málimetinshe, mundaı jobalardyń mamandardyń kásibı damýyna, sportshylardy daıarlaýdyń ozyq ádistemelerimen almasýǵa jáne sport salasyndaǵy halyqaralyq baılanystardy nyǵaıtýǵa yqpal etetini atalyp ótti. Qazaqstan UOK halyqaralyq yntymaqtastyqty keńeıtý uıym qyzmetiniń basym baǵyttarynyń biri ekenin jetkizdi.
– Qazaqstan Ulttyq Olımpıadalyq komıteti halyqaralyq yntymaqtastyqty júıeli túrde damytyp, bilim berý bastamalaryna erekshe kóńil bóledi. Tájirıbe, bilim jáne úzdik tájirıbelermen almasý sporttyń turaqty damýyna jáne mamandardyń kásibı deńgeıiniń artýyna yqpal etedi dep senemiz. Biz úshin Olımpıadalyq qozǵalysty nyǵaıtýǵa jáne sporttaǵy adamı áleýetti damytýǵa múmkindik beretin ashyq dıalog pen ózara is-qımyl alańdaryn qalyptastyrý mańyzdy, – dedi Nurlan Nógerbek.
Kezdesý qorytyndysy boıynsha eki eldiń UOK ókilderi áriptestik qatynastardy odan ári damytýǵa, mamandar daıarlaý salasyndaǵy yntymaqtastyqty keńeıtýge jáne sportty damytýǵa baǵyttalǵan jańa birlesken bastamalardy júzege asyrýǵa múddeli ekenin bildirdi.
Aıta keteıik, fýtboldan 2026 jylǵy álem chempıonatynda A tobynda synǵa túsip jatqan Meksıka— Ońtústik Koreıa kezdesýi aıaqtaldy.
