Qazaqstan jáne Armenııa saýda-ekonomıkalyq yntymaqtastyǵyn arttyrý sharalary talqylandy
ASTANA. QazAqparat - 10-11 tamyz aralyǵynda Qazaqstannyń Armenııadaǵy Elshisi Tımýr Orazaev Armenııanyń Aýyl sharýashylyǵy mınıstri Sergo Karapetıan jáne Qorǵanys mınıstri Seran Oganıanmen kezdesti, dep habarlady QR SІM baspasóz qyzmetinen.
Aýyl sharýashylyǵy mınıstrimen kezdesý barysynda Elshi Qazaqstan jáne Armenııa arasyndaǵy saýda-ekonomıkalyq yntymaqtastyq barysymen tanystyryp, ony arttyrýdyń sharalaryn usyndy.
Kezdesýde jańa kóliktik baǵyttardy belsendi paıdalaný týraly pikiler aıtyldy, Taýarlardy kórshiles Iran eliniń aýmaǵy arqyly alyp ótý týraly aıtyldy.
Aımaqtyń agrarlyq baǵytyn eskere otyra, taraptar keleshektegi birikken óndiris oryndaryn jaqsartyp, konservlengen jemis-kókónis ónimderin jetkizýdegi yntymaqtastyqqa arnaıy den qoıdy.
Elshi men S. Karapetıan eki eldiń arasyndaǵy saýda áleýetin jaqsartý joldaryn saraptap, jaqyn arada ótetin ekijaqty úkimetaralyq komıssııanyń qarsańynda naqty yntymaqtastyqty jandandyrýdyń jańa tásilderin tabýda belsendi túrde birige jumys júrgizýdiń qajettigin atap ótti.
2016 jyldyń 11 tamyzynda Elshi Orazaev Armenııa Qorǵanys mınıstri Seran Oganıanmen kezdesti.
Kezdesý barysynda jaqyn kúnderi Erevan qalasynda ótetin Ujymdyq Qaýipsizdik Shart Uıymyna (UQShU) múshe elderdiń qorǵanys mınıstrleriniń májilisin ótkizýge daıyndyǵy saraptaldy. Sonymen qatar, kezdesýde halyqaralyq jáne óńirlik qaýipsizdik, qaqtyǵystar aýmaǵyndaǵy jelilerdegi turaqtylyq suraqtary talqylanyp, bitimgershilik mıssııalarǵa qatysý tájirıbeleri, Aýǵanstandaǵy qazirgi áskerı jaǵdaı barysyndaǵy yntymaqtastasý monıtorıngi, sonymen qatar joǵarǵy áskerı oqý oryndaryndaǵy maman kadrlerin daıyndaý men oqý-jattyǵý sharalary talqylandy.
