Qazaqstan janarmaıdyń 12-30 paıyzyn Reseıden ımporttap keledi - U.Qarabalın

ASTANA. QazAqparat - Qazaqstan túrli janar-jaǵarmaılardyń 12-30 paıyzyn Reseıden ımporttap keledi. Bul týraly búgin Májilistegi «Nur Otan» partııasy fraktsııasynyń otyrysynda Energetıka vıtse-mınıstri Uzaqbaı Qarabalın málim etti.

Vıtse-mınıstrdiń aıtýynsha, táýelsizdik jyldarynan beri elimizge sheteldik ınvestıtsııalar aǵyny 200 mıllıard dollardan assa, olardyń 105 mıllıard dollarǵa jýyǵy nemese 50 paıyzdan astamy munaı jáne gaz salasyna tıesili bolyp tabylady. Sonymen qatar munaı men gaz salasy memlekettik bıýdjet kiristeriniń 40 paıyzyn, Ulttyq qor túsimderiniń 90 paıyzyn, al eksporttyń 70 paıyzdan astamyn qamtamasyz etip, ІJÓ-niń shamamen alǵanda 25 paıyzyn qalyptastyrýǵa septigin tıgizip otyr.

«Jalpy, elimizdegi munaı óńdeý mólsheri turaqty túrde jylyna 14-14,8 mln. tonnanyń sheńberinde qalyptasady. Al ótken on aıda negizgi qazaqstandyq munaı óńdeý zaýyttarymen 12,4 mln. tonna munaı óńdeldi, bul bekitilgen josparǵa 102,4 paıyzdy quraıdy. Kóbirek paıdalanylatyn AI-92 benzıni men dızeldik otyn teńgerimine kelsek, ondaı munaı óniminiń óndirisi elimizdiń qajettiligin tolyqtaı qamtamasyz ete almaıdy. Soǵan baılanysty Qazaqstan janar-jaǵarmaı túrlerin 12-30 paıyzǵa deıin Reseıden ımporttap otyr», - dedi U.Qarabalın.