Qazaqstan jańa úlgidegi jolaýshylar ushaǵyn birinshi bolyp satyp aldy
ASTANA. QazAqparat - Astanaǵa Airbus A320 NEO (new engine option) úlgidegi jańa jolaýshylar ushaǵy jetkizildi. Atalǵan ushaq ishki reısterdi oryndaıdy. Sondaı-aq Qytaı, Túrkııa, Úndistan men Birikken Arab Ámirlikterine ushatyn bolady. TMD men Ortalyq Azııa elderi ishinde Qazaqstan atalǵan úlgidegi ushaqty birinshi bolyp satyp aldy, dep xabarlaıdy QazAqparat tilshisi.
Airbus A320 NEO (new engine option) reaktıvti jolaýshylar ushaǵy sanatyna jatady. Onda 16 bıznes-klass jáne 132 ekonom-klass oryndary bar. Ushaqta Pratt & Whitne qozǵaltqyshy ornatylǵan. Sonyń arqasynda ushaq buǵan deıingi úlgilerge qaraǵanda janar-jaǵar maıdy 15 paıyzǵa az jaǵady. Sóıtip, ushýdyń qashyqtyǵyn uzartyp otyr. Syrtqy dybystar da qatty estilmeıdi. Sebebi A320NEO ushaǵynda dybys ótkizý kórsetkishi ICAO talaptarynan 19 dB-ge tómen. Salony da keń. Al jaryq túsirý júıesi dıodty texnologııaǵa negizdelgen.
Aıta keteıik, ótken jyly «Eır Astana» kompanııasy Airbus A320 NEO úlgidegi 11 jolaýshylar ushaǵyn lızıngpen satyp alý týraly kelisimdi rásimdegen bolatyn. Búgin tanystyrylǵan Airbus - solardyń biri. Kelesi jyldyń basynda taǵy eki ushaq jetkiziledi degen jospar bar.
