Qazaqstan jańa onjyldyqta aldyna qoıǵan mindetterdi oryndaı alady - Elbasy
ASTANA. Naýryzdyń 19-y. QazAqparat /Ernur Aqanbaı/ - Búgin Astanada «Naýryz nury» merekelik keshinde Elbasy Nursultan Nazarbaev Qazaqstan jańa onjyldyqta aldyna qoıǵan mindetterdi oryndaı alatynyn atap kórsetti, dep habarlaıdy QazAqparat.
«Búginde biz jańa mindetterdi mejelep otyrmyz. Biz olardy oryndaı alamyz. Óıtkeni biz jyl ótken saıyn ózimizdiń basty dáýletimiz -beıbitshilikti, ultaralyq jáne konfesssııaaralyq kelisimdi eselep kelemiz. Ǵasyrlar boıy dál áz Naýryzda bizdiń babalarymyz osy jaıynda oılanǵan. Kóktemgi merekeniń tereń maǵynasy osynda. Bizdiń dostyǵymyz ben kelisimimizdiń myqty irgetasy keleshekte de árbir kóktemdi osyndaı optımızmmen jáne senimdilikpen qarsy alýǵa múmkindik beredi», dedi óz sózinde Prezıdent.
Elbasy Qazaqstannyń tarıhynda jańa kezeń bastalǵanyn, bıylǵy Joldaýynda elimizdiń aldyna jańa onjyldyqqa arnalǵan birqatar mańyzdy mindetterdi qoıǵanyn aıta kele: «Biz elimizdiń ekonomıkalyq damýynda qýatty serpin jasaýymyz, jańa kásiporyndardy, energetıkalyq qýattardy jáne joldardy salýymyz, óndiriske eń ozyq tehnologııalardy engizýimiz, aýyl sharýashylyǵynda sapaly ósimge qol jetkizýimiz kerek. Bıznes úshin jańa kókjıekter ashylýda, bıznes bizdiń elimizdiń senimdi tiregi bolýy tıis. Biz elimizdiń ekonomıkasyn myǵym, halyqtyń ómirin jaqsarta túsetin osy mindetterdi oryndaýdy bastap kettik», dedi. Sondaı-aq, Prezıdent otandyq bilim berýdi jáne medıtsınany barynsha joǵary deńgeıge shyǵaratynymyzdy atap kórsetti.
