Qazaqstan jańa naryqtarǵa 1,5 mln tonnaǵa deıin astyq eksporttamaq
ASTANA. KAZINFORM — Qazaqstan jańa naryqtarǵa 1,5 mln tonnaǵa deıin astyq eksporttaýdy kózdeıdi. Bul jaıynda Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
— Bıyl Qazaqstannyń bıdaı eksporttaýdaǵy áleýeti shamamen 12 mln tonna dep baǵalanyp otyr. Qazaqstandyq ónimderdi jańa naryqtarǵa jetkizý, ásirese kólik shyǵyndary men baǵanyń tómendigi turǵysynan qıyndyq týǵyzady. Osyǵan oraı Aýyl sharýashylyǵy mınıstrligi azyq-túlik astyǵyn tasymaldaý shyǵyndaryn arzandatý úshin sýbsıdııa tóleý týraly Qazaqstan Respýblıkasy Úkimetiniń qaýlysynyń jobasyn (budan ári — Joba) ázirledi. Joba jumys tártibimen múddeli memlekettik organdarmen (Syrtqy ister mınıstrligi, Ulttyq ekonomıka mınıstrligi, Qarjy mınıstrligi jáne Básekelestikti qorǵaý jáne damytý agenttigi) kelisildi, — dedi Úkimet basshysy.
Onyń atap ótýinshe, Qazaqstannyń halyqaralyq mindettemelerine jáne Dúnıejúzilik saýda uıymynyń erejelerine sáıkes eksportty sýbsıdııalaýǵa shekteýler bar. Bul rette jobada Qazaqstannyń eksporttyq múmkindikterine qatysty qandaı da bir shekteýlerdiń týyndaýyna jol bermeý maqsatynda eksportqa qatysty eskertpeler men shekteýler aıtylmaıdy.
— Bul saqtaý pýnktterin bosatý jáne jańa ótkizý naryqtaryn ashý úshin qajet (Eýropalyq Odaq elderi, Soltústik Afrıka, Iran Islam Respýblıkasy jáne Ońtústik-Shyǵys Azııa elderi). Jalpy jańa naryqtarǵa 1,5 mln tonnaǵa deıin astyq eksporttaý kózdelýde. Jobanyń mańyzdy aspektisi — astyq tasymaldaýdy uıymdastyrýda ulttyq temirjol kompanııasynyń jaýapkershiligin aıqyndaý. Bul kompanııa tasymaldaýdy uıymdastyratyn operator retinde belgilenip, astyq tasymalyna baılanysty kóliktik-ekspedıtorlyq qyzmetter kórsetetin zańdy tulǵa retinde áreket etedi, — dedi Premer-Mınıstr.
Úkimet basshysy bıýdjettik sýbsıdııalar operatorǵa azyq-túlik astyǵyn tasymaldaý úshin kórsetilgen naqty qyzmetter úshin tólenedi. Sýbsıdııa tóleý mehanızmi 2024 jyldyń 1 qyrkúıeginen bastap 2025 jyldyń 1 qyrkúıegine deıin qoldanylatyn bolady. Bul kezeńde eksporttaýshylar kóliktik shyǵyn shekkenin rastaıtyn qujattar negizinde kómek alady.
— Sonymen qatar, operator aldaǵy jóneltilimderdi josparlaý maqsatynda naqty jóneltilgen azyq-túlik astyǵynyń sýbsıdııalanǵan baǵyttary boıynsha monıtorıng júrgizedi. Sondaı-aq, operator resmı saıtta kún saıyn naqty áketilgen astyq kólemi jáne astyq tasymaldaýdyń tólengen qunynyń mólsheri týraly tıisti aqparatty ornalastyrady, — dedi ol.
Buǵan deıin habarlaǵanymyzdaı, joǵary deńgeıde óńdelgen ónim shyǵaratyn klaster qurýǵa baǵyttalǵan 17 iri jobany iske asyrý nátıjesinde 24 myńnan astam jańa jumys orny qurylady.