Qazaqstan jańa memleketpen dıplomatııalyq qatynas ornatty
ASTANA. QazAqparat - Nıý-Iork qalasynda Qazaqstan Respýblıkasy men Marshall Araldary Respýblıkasynyń BUU janyndaǵy turaqty ókilderi Qaırat Omarov pen Amatlaın Elızabet Kabýa eki el arasynda dıplomatııalyq qatynas ornatý týraly birlesken kommıýnıkege qol qoıdy, dep habarlaıdy QazAqparat tilshisi QR Syrtqy ister mınıstrligine silteme jasap.
Kezdesý kezinde eki eldiń ókilderi BUU aıasynda ózara qoldaý, sonyń ishinde uıymdy reformalaý máselelerin talqylady. BUU-nyń ornyqty damý maqsattaryna jáne klımattyń ózgerýine baılanysty máselelerge de erekshe mán berildi. Qazaqstan Respýblıkasynyń elshisi Qaırat Omarovtyń aıtýynsha, birlesken kommıýnıke el arasyndaǵy ekijaqty formattaǵy jáne halyqaralyq uıymdardyń sheńberinde túrli salalardaǵy qatynasty damytýǵa múmkindik berip otyr.
«Al Amatlaın Elızabet Kabýa Qazaqstannyń klımat ózgerýimen kúres jáne balamaly energııa kózderine kóshý sharalaryna belsendi qatysyp otyratyny úshin alǵys bildirdi. Ol Astanada «EKSPO-2017» halyqaralyq mamandandyrylǵan kórmesi aıasynda ótken Marshall araldarynyń ulttyq kúni is-sharasyna jeke qatysqanyn da atap ótti. Marshall araldarynyń turaqty ókili ıadrolyq qarýdy taratpaý salasyndaǵy Qazaqstan jáne onyń Prezıdenti Nursultan Nazarbaevtyń beıbit halyqaralyq bastamalaryna qoldaý bildirip, osy salada odan ári yntymaqtastyqqa daıyn ekenin aıtty. ıAdrolyq synaqtardan zardap shekken Marshall araldary, Qazaqstannyń jahandyq deńgeıde osy synaqtarǵa tyıym salý týraly bastamasyn tolyǵymen qoldaıdy», - delingen resmı habarlamada.
Aıta keteıik, Marshall Araldary Respýblıkasy - Tynyq muhıtynyń batys bóliginde ornalasqan memleket. Halyq sany shamamen 57 myń adam. 1986 jyly Amerıka Qurama Shtattarymen erkin kelisimshart negizinde táýelsizdik aldy. 1947-1962 jyldar aralyǵynda memlekettiń araldarynda ıadrolyq synaqtar júrgizildi. 1954 jyly AQSh Bıkını atollda sýtegi bombasyn alǵash ret synaqtan ótkizdi. Jarylys araldy tolyǵymen joıyp jiberdi.
Ekonomıkasynyń negizin quraıtyn salalar - tabıǵı aýyl sharýashylyq ónimderi, kopra ónimderin eksporttaý jáne AQSh-tan alatyn qarjylaı kómek. Valıýtalyq túsimderdiń úlken bóligi - týrızmnen kelip túsetin kiris.
Eldiń basty problemalarynyń biri - jahandyq klımattyń ózgerýi. Bul - teńiz deńgeıiniń kóterilýi, jaǵalaýdaǵy erozııa, tuzdy sýdyń topyraqqa enýi, qurǵaqshylyq pen sý tasqyny, tsıklondar men daýyldar.
