Qazaqstan jańa ken oryndaryn izdeýge kiristi: elde 200 uńǵyma burǵylanady
ASTANA. KAZINFORM — Qazaqstanda jańa ken oryndaryn izdeý maqsatynda 200 uńǵyma burǵylaý josparlanyp otyr, dep habarlaıdy Energetıka mınıstrliginiń baspasóz qyzmeti.
Atyraýda ótken KAZDRILLING konferentsııasynda barlaý-baǵalaý burǵylaýynyń perspektıvalary, servıstik naryqtyń daıyndyǵy jáne otandyq burǵylaý salasyn odan ári damytý máseleleri talqylandy.
Energetıka vıtse-mınıstri Erlan Akbarov burǵylaý kólemin ulǵaıtý jańa ken oryndaryn ashý jáne elimizdiń resýrstyq bazasyn tolyqtyrý úshin qajet ekenin atap ótti. Boljamdy baǵalaýǵa sáıkes, barlaý-baǵalaý burǵylaýynyń kólemi 2026 jyly shamamen 80 uńǵymany, al 2027–2028 jyldary jyl saıyn 120 uńǵymany quraýy múmkin.
Munaı-gaz áleýeti joǵary, az zerttelgen shógindi basseınderge erekshe nazar aýdaryldy. Mundaı ýchaskelerdi berý tártibi jeńildetildi: ótinim kelip túskennen keıin mınıstrlik 10 jumys kúni ishinde aýktsıon ótkizedi. Jumys baǵdarlamasyna sáıkes alǵashqy úsh jylda ýchaske aýmaǵynyń keminde 30 paıyzynda seısmıkalyq barlaý jumystaryn júrgizý jáne keıinnen barlaý uńǵymalaryn burǵylaý kózdelgen.
Qazaqstandyq qamtýdy damytýǵa da erekshe mán berildi. Búginde elimizde qajetti óndiristik quzyretter qalyptasqan. Atap aıtqanda, Atyraýdaǵy «Jigermunaıservıs» zaýyty burǵylaý qashaýlaryn, kalıbratorlardy jáne basqa da burǵylaý jabdyqtaryn shyǵarady.
— Bizdiń mindetimiz — burǵylaý qyzmetteriniń turaqty ári básekege qabiletti naryǵyn qalyptastyrý. Nátıjesinde jańa geologııalyq ashylymdar jasalyp, qorlar tolyqtyrylyp, otandyq óndiris damyp, bilikti jumys oryndary qurylyp, salyq túsimderi artýy tıis, — dep atap ótti vıtse-mınıstr.
Osyǵan deıin JI Qazaqstanda munaı uńǵymalaryn burǵylaıtyn eń tıimdi núkteni anyqtaıtynyn jazǵanbyz.
