Qazaqstan jańa ınvestorlyq vızany engizedi

ASTANA. KAZINFORM — Qazaqstan Respýblıkasy halyqaralyq bızneske jaqyndaı túsý jolynda taǵy bir mańyzdy qadam jasady.  Syrtqy ister mınıstrliginiń bastamasymen elimizdiń ınvestıtsııalyq tartymdylyǵyn arttyrýǵa jáne uzaq merzimdi iskerlik seriktestikti qoldaýǵa baǵyttalǵan ınvestorlyq vızany alý qaǵıdalary bekitildi.

Jańa talaptarǵa sáıkes Qazaqstan kompanııalarynyń jarǵylyq kapıtalyna nemese otandyq baǵaly qaǵazdarǵa keminde 300 000 AQSh dollary kóleminde ınvestıtsııa salǵan shetel azamattary ınvestorlyq vızany resimdeý úshin elektrondy ótinish bere alady. Bul «altyn vıza» Qazaqstanda 10 jylǵa deıin turýǵa ruqsat alý múmkindigin kózdeıdi.

— Mundaı vızalyq baǵdarlamalar halyqaralyq tájirıbede (sonyń ishinde Eýropa elderi, AQSh, BAÁ jáne Sıngapýrda) keńinen qoldanylyp, kapıtal, tehnologııa men iskerlik belsendilikti tartýdyń nátıjeli quraly retinde óz tıimdiligin dáleldedi. Qazaqstan osy tájirıbege qosylyp, ınvestıtsııalyq rezıdenttiktiń ózindik modelin usynady. 

«Altyn vızalar» sheteldik ınvestorlar úshin qolaıly ári boljamdy orta qalyptastyryp, zańdy kepildikter berýge jáne eldiń ınvestıtsııalyq ahýalyna senimdi nyǵaıtýǵa baǵyttalǵan. Bul jańa bastama eldiń ashyqtyqqa, kapıtaldy qorǵaýǵa jáne turaqty halyqaralyq ekonomıkalyq baılanystardy damytýǵa baǵyttalǵan strategııalyq baǵdaryn kórsetedi, — delingen SІM habarlamasynda.

Qujat resmı jarııalanǵannan keıin 10 kún ótken soń kúshine enedi. 

Aıta ketelik Qazaqstannyń kóshpeli vızasyn alǵandar salyqty qalaı tóleıtini týraly jazǵan edik.