Qazaqstan jańa epıdemıologııalyq maýsymǵa daıyndalyp jatyr
ASTANA.KAZINFORM – Qazaqstanda jańa epıdemıologııalyq maýsymǵa daıyndyq bastaldy. Bas memlekettik sanıtar dáriger Sarhat Beısenova 2025-2026 jyldarǵa tumaýǵa, JRVI jáne COVID-19-ǵa qarsy sharalar týraly qaýlyǵa qol qoıdy.
Vaktsınatsııa
• Halyqty tumaýǵa qarsy ımmýndaý 15 qyrkúıekten bastalady.
• 1 qyrkúıekke deıin ákimdikter vaktsınatsııalaýǵa jatatyn adamdardyń tizimin jasaý tıis.
• Ekpe qaýip tobyna jatatyn adamdarǵa – balalarǵa, júkti áıelderge, medıtsına qyzmetkerlerine, qart adamdarǵa – azamattardyń kelisimimen júrgiziledi.
Medıtsınalyq uıymdar
• 1 qazannan bastap medıtsına qyzmetkerleri úshin maska taǵý rejımi engiziledi.
• Qosymsha ınfektsııalyq tósek-oryndar daıyndaý josparlary ázirlengen.
• Medıtsınalyq mekemelerde kúsheıtilgen dezınfektsııalyq rejım, JRVI belgileri bar patsıentterge arnalǵan kirý súzgileri engiziledi.
• Júkti áıelder men bir jasqa deıingi balalarǵa úıde qyzmet kórsetý qarastyrylǵan.
• Tumaý, JRVI, COVID-19 jáne aýyr pnevmonııalar boıynsha zerthanalyq monıtorıng júrgiziledi.
Bilim berý salasy
• Mektepter men balabaqshalarda kún saıyn tańǵy súzgi júrgiziledi. Eger bir synyptyń 20–30% oqýshysy aýyrsa, kabınet júıesi toqtatylady. 30% jáne odan kóp jaǵdaıda – oqý onlaın formatqa kóshiriledi. Bilim berý uıymdary sanıtaızerler ornatyp, balalarǵa gıgıena boıynsha túsindirý sabaqtaryn ótkizýi tıis.
Erekshe baqylaýda júkti áıelder men bir jasqa deıingi balalar. Bul sanattaǵy turǵyndar úshin úıge shaqyrýlarǵa basymdyq beriledi. Medıtsınalyq qyzmetkerler olardyń jaǵdaıyna kúndelikti úıge baryp qyzmet kórsetip, asqyný jaǵdaılarynda, mysaly, pnevmonııa kezinde, ýaqytyly aýrýhanaǵa jatqyzýdy qamtamasyz etýge mindetti.
1 qazannan bastap osy sanattaǵy azamattar arasynda kúndelikti syrqattanýshylyq monıtorıngi júrgiziledi.
Monıtorıng 1 qyrkúıekten bastap – aptalyq, al 1 qazannan bastap kúndelikti monıtorıng engiziledi. Óńirlik organdar syrqattanýshylyq boıynsha jas erekshelikteri boıynsha esep beredi.
Ulttyq saraptama ortalyǵy men Qoǵamdyq densaýlyq saqtaý ortalyǵy zerthanalyq baqylaýdy, PTR testileýdi jáne sekvenırleýdi qamtamasyz etedi.
Eske salaıyq, tumaý men jiti respıratorlyq vırýstyq ınfektsııalar adamǵa qolaısyzdyq qana týdyrmaı, asqynǵan jaǵdaıda COVID sııaqty aǵzaǵa qaýipti bolýy múmkin ekenin jazǵanbyz.