Qazaqstan jańa astyqtyń 9,5 mln. tonnasyn eksporttaýy múmkin

ASTANA. 23 qyrkúıek. QazAqparat - Qazaqstan 9,5 mln. tonna astyq eksporttaýy múmkin. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda QR Aýyl sharýashylyǵy mınıstri Asyljan Mamytbekov málim etti.

Bıylǵy astyqtyń shyǵymdylyǵy boıynsha túzetýler jasalǵandyǵyna toqtalǵan mınıstr, onyń kólemi 18,5 mln. tonnaǵa deıin boljanyp otyrǵandyǵyn jetkizdi. «Osyny eskere otyryp, eksporttyq áleýet te sáıkesinshe birshama artatyn bolady», - dedi ol.

Osy oraıda ol eksportqa boljanǵan kólemniń barlyǵyn satýǵa tolyq kepildik joq ekenin, ıaǵnı bul turǵyda suranys pen elimizden astyqty dástúrli satyp alýshylardyń múmkindigine baılanysty ekenin atap ótti.

«Máselen, 2011 jyly biz býnkerlik salmaqta 30 mln. tonnaǵa jýyq astyq bastyrdyq, alaıda 12,5 mln. tonnasyn sattyq. Іshki qajettilik 7-8 mln. tonnadan aspaıdy. Bizdiń jospar boıynsha eksport deńgeıi ortasha kólemnen sál joǵary bolady, ıaǵnı 9-9,5 mln. tonna shamasynda», - dep túıdi A. Mamytbekov.