Qazaqstan jan basyna shaqqandaǵy dáriger sany boıynsha keıbir damyǵan elderdiń aldynda tur – DSM

ASTANA. QazAqparat – Densaýlyq saqtaý mınıstriniń birinshi orynbasary Tımýr Sultanǵazıev eldegi dáriger tapshylyǵyn azaıtý úshin qandaı sharalar qolǵa alynyp jatqanyn aıtty, dep habarlaıdy QazAqparat tilshisi.

«Medıtsınalyq mamandar tapshylyǵy týraly aıtsaq, Qazaqstanda 3,5 myńnan astam dáriger men medıtsınalyq personal jetispeıdi. Biraq bizde 80 myńdaı dáriger personaly bar. Paıyzdyq qatynaspen alsaq, bul salystyrmaly túrde sonsha kóp emes. Dáriger sanyn jan basyna shaqsaq, Qazaqstannyń kórsetkishi keıbir damyǵan elderdiń kórsetkishinen de jaqsy. Muny da túsiný kerek. Búgingi forýmnyń shaǵyn otyrysynda maman tapshylyǵyn sheshý máselesi de talqylanady», - dedi ol densaýlyq saqtaý basshylarynyń ekinshi respýblıkalyq forýmynyń klýarynda.

Sondaı-aq, vıtse-mınıstr dárigerlerdiń mártebesi men jaýapkershiligin kóterý de mańyzdy ekenin atap ótti.

«Medıtsına salasyna mamandar tartýdyń bazalyq amaly – áleýmettik jaǵdaıdy jaqsartý. 2019 jyldan beri dárigerlerdiń aılyǵy jyl saıyn 30 paıyzǵa, meıirbıkelerdiń aılyǵy 20 paıyzǵa ósip kele jatqanyn bilesizder. Kelesi jyly da dál osyndaı mólsherde kóteriledi. Prezıdenttiń dáriger aılyǵyn respýblıkalyq ortasha jalaqydan eki ese joǵary etý týraly tapsyrmasy bar. Mınıstrlik Úkimetpen birge sol tapsyrmanyń aıasynda jumys istep jatyr.

Sonymen birge dárigerlerdiń áleýmettik mártebesin zań júzinde bekitý kózdelip otyr. Birneshe jyl buryn pedagogterdiń mártebesi qoldanysqa engiligen edi. Dál osyndaı baǵytta dárigerlerdiń mártebesin de kóterý kerek. Qazir dárigerdiń mártebesi men kásibı jaýapkershiligi týraly zań jobasy Májiliske engizilgen, qaralyp jatyr.

Dárigerlerge emdelýshiler tarapynan da, túrli uıymdardyń tarapynan da tıisý faktileri oryn alyp jatady. Olar problemanyń túıinin dárigerden kóredi. Biraq dáriger óz mindetin atqaryp jatqanyn, qoǵam ıgiligine jumys isteıtinin túsiný qajet. Ókinishke qaraı, ondaı oqıǵalar bolyp turady»,- dedi Tımýr Sultanǵazıev.