Qazaqstan jalpy qýaty 26 GVt bolatyn jańa energııa óndirý nysandaryn salady
ASTANA. KAZINFORM – Energetıka mınıstri Almasadam Sátqalıev Ortalyq Azııa elderi jáne Ázerbaıjan energetıka mınıstrleriniń kezdesýinde eldiń energetıkasy júıesi qandaı reformalardy bastan ótkerip jatqanyn aıtty.
«Óńirdiń tranzıttik áleýeti tolyq ashylmaǵanyn eskersek, energetıkalyq resýrstar saýdasyndaǵy yqpaldastyqty nyǵaıtý jumystaryn belsendi júrgizý mańyzdy dep esepteımin. Energııamen jabdyqtaýdyń turaqtylyǵyn saqtaý qajet ekenin eskersek, óńirdegi halyq sany men elektr qýatyn tutynýshylardyń sany udaıy ósip kele jatqanyn eskersek, jańa energetıkalyq qýat kózderin engizý kerek», - dedi mınıstr.
Almasadam Sátqalıev eldiń energetıka júıesi kezekti jańǵyrtýdan ótip jatqanyn atap ótti.
«Qazaqstan óz kezeginde qoldanystaǵy qýat kózderin jańǵyrtyp, jalpy qýaty 26 gıgavatt bolatyn jańa kózderdi salýdy josparlap otyr. Zańnama aıasynda salany damytý josparlaryn jetildirip, óndiristerdi energııa únemdeýshi rejımge kóshirý arqyly, tarıf saıasatyn qaıta qarap jańartylatyn energııa kózderin ashý arqyly reformalaý josparlanǵan», - dedi vedomstvo basshysy.
