Qazaqstan jaldamaly jumysshylardyń quqyǵyn qorǵaıtyn konventsııany qabyldaýy kerek - Kásipodaq uıymy
ASTANA. QazAqparat - 2011 jyly Halyqaralyq eńbek uıymynyń bas konferentsııasynda «úı qyzmetshileriniń laıyqty jumysy» týraly konventsııa qabyldanǵan bolatyn. Jumys izdep keletin mıgranttar kóp bolǵandyqtan, onyń ústine, respýblıka boıynsha jeke tulǵaǵa jaldanyp jumys isteıtin azamattar da bar bolǵandyqtan, olardyń quqyǵyn qorǵaý úshin Qazaqstan osy konventsııany qabyldaýy kerek, deıdi QR Kásipodaqtar federatsııasy tóraǵasynyń orynbasary Gúlnár Jumageldıeva.
Bul týraly ol búgin Astanada Qazaqstan Respýblıkasyndaǵy Qyzyl Aı Qoǵamy, Kásipodaqtar Federatsııasy, «BUU-Áıelder», Densaýlyq saqtaý jáne áleýmettik damý mınıstrligi, Ulttyq ekonomıka mınıstrligi, Іshki ister mınıstrligi, úkimettik emes uıymdardyń qatysýymen ótken ulttyq konsýltatıvtik keńes aıasynda áńgimelep berdi. «Ókinishke oraı, bir de bir resmı organ jeke tulǵalarǵa «jaldanyp» jumys isteıtin adamdardyń naqty statıstıkasyn bere almaıdy. Sebebi, ádette, bireýdiń úıinde jumys isteıtin adamdar eńbek kelisimshartyn jasamaıdy. Onyń ústine, eńbek mıgranttary elimizge kelgen kezde jumys ornyn naqty aıtpaıdy, sebebi, ol jumysty elge kirgennen keıin ǵana izdeı bastaıdy. 2011 jyly Halyqaralyq eńbek uıymynyń bas konferentsııasynda úı qyzmetshileriniń laıyqty jumysy týraly №189 konventsııa qabyldanǵan bolatyn. Al konventsııa degenimiz - kóp elder basshylyqqa alatyn normalar men standarttar jıyntyǵy. Sondyqtan osyndaı sharalar arqyly Qazaqstan konventsııa talaptary men mazmunyn túsindirý jumystaryn bastap ketti. Sebebi belgili bir ýaqyttan keıin bizdiń de osy konventsııany qabyldaýymyz kerek. Dál qazir Qazaqstan tehnıkalyq konsýltatsııalar ótkizip, konventsııanyń mazmunyn túsindirýde», - degen ol osy konventsııany ázirge álemniń 12 eli ǵana qabyldaǵanyn atap ótti. G.Jumageldıevanyń paıymdaýynsha, Qazaqstanda úı qyzmetshileriniń quqyǵy durys saqtalmaıdy. Mysaly, bireýdiń balasyn baǵatyn qyzmetshi kelinshek ózi de ana atanady. Biraq eńbek kelisimsharty bolmaǵan soń, ol dekrettik demalystyń aqshasyn da ala almaıdy. Bolmasa, uzaq jyldar medbıke bolǵan jasy úlken adamdar qarııa kisilerdiń kútýshisi qyzmetine ornalasýy múmkin. Biraq taǵy da sol eńbek kelisimsharty bolmaǵan soń, kútýshiniń quqyqtary zańmen rettelmegen soń jeke tulǵa onyń jalaqysyn qolma-qol beredi de, ózi de zeınet jasyna jetip qalǵan kútýshiniń zeınetaqy qoryna bir tıyn da túspeıdi. «Jeke tulǵalarǵa jaldanyp jumys isteıtin qyzmetshilerdiń shaǵymdary óte kóp. Biraq naqty qujat bolmaǵan soń, shaǵymdaryn aıta almaıdy. ıAǵnı, eńbek kelisimsharty jasalmaǵan soń, óz quqyǵyn qorǵaı almaıdy. Negizi, bizdiń eń birinshi maqsatymyz - jeke tulǵalar úı qyzmetshisin jaldaǵanda, mindetti túrde eńbek shartyn jasasa deımiz. Sebebi, eńbek sharty bolmasa, áleýmettik kómek tólenbeıdi, zeınetaqy qoryna aqsha túspeıdi», - deıdi ol. Jalpy, onyń aıtýynsha, Qazaqstan boıynsha barlyq jumysshylardyń ishinde úı qyzmetshileriniń sany shamamen 15 paıyzdy quraıdy. Kóbine, úı qyzmetshileri degenimiz - bala kútýshi, úı tazalaýshy, baǵban, aspaz, kúzetshiler eken. Aıta keteıik, kezdesý QR Qyzyl Aı qoǵamymen birge, Ortalyq Azııadaǵy (Qazaqstan) «BUU-Áıelder» Kópjaqty qurylym bóliminiń bastamasymen «Eńbek jáne kóshi-qon týraly ulttyq zańnamalar: Qazaqstandaǵy úı qyzmetkerleriniń quqyqtaryn tıimdi sheshý» jobasyn júzege asyrý maqsatynda uıymdastyryldy.
