Qazaqstan jalaqy boıynsha eki júzge jýyq eldiń ishine 80-orynda tur

ASTANA. KAZINFORM — Jalaqy deńgeıi boıynsha álemdik reıtıngte Qazaqstan 196 eldiń ishinde 80-shi orynǵa turaqtap otyr. Bul týraly Finprom.kz habarlady.

Qazaqstandyqtardyń ortasha aılyq jalaqysy — 382 myń teńge. Bul ótken jylmen salystyrǵanda 12,2%-ǵa artyq. 

Statıstıkaǵa súıensek, Atyraý, Mańǵystaý jáne Ulytaý oblystaryndaǵy turǵyndardyń aılyq tabysy joǵary. Sondaı-aq alǵashqy bestikke Astana men Almaty da kirip otyr.

Al Jetisý, Soltústik Qazaqstan jáne Jambyl oblystarynda jalaqy mólsheri tómen.

Amerıka valıýtasyna aıyrbastasaq, bizdiń ortasha jalaqymyz 673 dollarǵa teń. TMD elderiniń ishinde biz Reseıden (2,2 myń dollar) keıingi ekinshi oryndamyz.

Reıtıngte bizden tómen Túrkimenstan (654 dollar), Belarýs (621 dollar), Armenııa (541 dollar), Ázerbaıjan (494 dollar), Ózbekstan (351 dollar), Qyrǵyzstan (228 dollar) jáne Tájikstan (169 dollar) jaıǵasqan.

Al dúnıe júzinde eń joǵary jalaqy Shveıtsarııada tirkeldi — 8,1 myń dollar.

Alǵashqy úshtikte Lıýksembýrg pen AQSh tur. Eń tómengi jalaqy Lesotoda (24 dollar), Angolada (27 dollar) jáne Malavıde (31 dollar) tirkelip otyr.