Qazaqstan jahandyq zeınetaqy ındeksinde «ornyqtylyq» reıtıngin saqtap qaldy

ASTANA. KAZINFORM — CFA ınstıtýty men Mercer Consulting halyqaralyq kásibı konsaltıng kompanııasy jarııalaǵan «Jahandyq zeınetaqy ındeksi-2025» atty esepte Qazaqstan óz kórsetkishin jaqsartty.

Esepte álem halqynyń 65 paıyzyn qamtyǵan 52 eldiń zeınetaqy júıesine sholý jasalyp, «aqylǵa qonymdylyq», «ornyqtylyq», «basqarý sapasy» sııaqty úsh túrli ólshem boıynsha reıtıng túzilgen.

Qazaqstan ındekstegi 100 baldyń 65-in alyp, «B» sanatyna jatqyzylǵan. Byltyrǵy kórsetkish 64 ball bolǵan edi. Al álemdegi ortasha ındeks — 64,5 ball.

Naqtyraq aıtsaq, Qazaqstan zeınetaqy tólemderiniń jetkiliktiligi («aqylǵa qonymdylyq» ındeksi) boıynsha 47 ball, júıeniń demografııalyq qysymǵa tótep berý qabileti («ornyqtylyq» ındeksi) boıynsha 74,2 ball, halyqtyń senimi, basqarýdyń ashyqtyǵy men salymshylardyń quqyqtaryn qorǵaý kórsetkishi («basqarý sapasy» ındeksi) boıynsha 81,1 ball alǵan.

Esepte Qazaqstanǵa óz júıesin jetildire túsý úshin ózin-ózi qamtamasyz etip otyrǵan azamattardy BJZQ-ǵa tartý kerektigi aıtylǵan. Elde ortasha ómir súrý jasy uzarǵandyqtan, zeınetke shyǵatyn jasty da ulǵaıtý qajettigi atap ótilgen. Shottaǵy aqshanyń zeınet jasyna jetkenge deıin ustalyp ketý kórsetkishin tómendetip, azamattardyń, onyń ishinde áıelderdiń qarjylyq saýatyn, júıege qyzyǵýshylyǵyn arttyrý kerek ekeni de aıtylǵan.

— Qazaqstannyń ındekstegi kórsetkishteri Halyqaralyq valıýta qorynyń ekonomıkalyq ósim týraly jańartylǵan málimetterine baılanysty 2024 jylǵy 64 baldan 2025 jyly 65-ke jetip otyr, — delingen esepte. 

Jahandyq ındekstiń «V» reıtınginde Qazaqstannan bólek Ýrýgvaı, Ulybrıtanııa, Shveıtsarııa, Saýda Arabııasy, Portýgalııa, Jańa Zelandııa, Meksıka, Kýveıt, Ońtústik Koreıa, Irlandııa, Gonkong, Germanııa, Frantsııa, Horvatııa, Kanada, Belgııa sııaqty elder de tur.

Buǵan deıin Qazaqstannyń Zeınetaqy qorynan 200 mlrd teńge zańsyz sheshilgenin jazǵan edik.