Qazaqstan jahandyq tıtan naryǵyndaǵy ornyn qalaı kúsheıtpek
ASTANA. KAZINFORM - Qazaqstan Respýblıkasynyń Premer-mınıstri Oljas Bektenov «Óskemen tıtan-magnıı kombınaty» AQ dırektorlar keńesiniń tóraǵasy Sılvan Gelermen kezdesti, dep habarlaıdy Úkimettiń baspasóz qyzmeti.
Júzdesý barysynda kásiporynnyń ornyqty damýy, ınvestıtsııalyq jobalardy júzege asyrý jáne Qazaqstannyń jahandyq tıtan naryǵyndaǵy ustanymyn odan ári nyǵaıtý máseleleri qaraldy.
«Óskemen tıtan-magnıı kombınaty» AQ – shıkizat óndirýden bastap daıyn ónim shyǵarýǵa deıingi tolyq óndiristik tsıkldi qamtıtyn álemdegi eń iri tiginen ıntegratsııalanǵan tıtan óndirýshilerdiń biri.
2025 jyldyń qorytyndysy boıynsha shamamen 87 mlrd teńgege 12 myń tonna tıtan satyldy.
Bıyl tıtan quımalary men qorytpalary óndirisi 7%-ǵa ósedi dep boljanyp otyr. Kásiporyn ónimderi aeroǵarysh salasynda, munaı-hımııa jáne atom ónerkásibinde, medıtsına men keme jasaý óndirisinde qoldanylady. Qazaqstandyq tıtannyń aeroǵarysh salasynyń jahandyq naryǵyndaǵy úlesi shamamen 20%-dy quraıdy.
Óskemen tıtan-magnıı kombınaty Boeing, Airbus, Safran, Rolls-Royce, TIMET, Howmet Aerospace, Dynamet, PCC jáne POSCO sııaqty jetekshi halyqaralyq ónerkásiptik korporatsııalardyń bekitilgen jetkizýshisi bolyp sanalady. ÓTMK-niń 2033 jylǵa deıingi ınvestıtsııalyq baǵdarlamasyna nazar aýdaryldy. Oǵan jalpy somasy 255,5 mlrd teńge bolatyn 25 joba kiredi.
Olardyń ishinde, kásiporynnyń jobalyq qýatyn jylyna 10 myń tonnaǵa ulǵaıta otyryp, keýekti tıtan óndirý boıynsha jańa tseh salý, gaz tazartý jabdyǵyn jańǵyrtý, biryńǵaı ónerkásiptik MES-júıesin engizý, sondaı-aq óndiristik derekterdi, energııany tutynýdy, tehnologııalyq baqylaýdy jáne ónerkásiptik qaýipsizdikti taldaý úshin jasandy ıntellekt men taldaý platformasyn iske qosý bar.
Osy jobalardy júzege asyrý ónimniń ózindik qunyn tómendetýge, energııa tıimdiligin arttyrýǵa jáne kásiporynnyń óndiristik qýatyn keńeıtýge múmkindik beredi.
Budan bólek, shıkizat bazasyn qamtamasyz etý, halyqaralyq ónerkásiptik kooperatsııany damytý, eksporttyq áleýetti saqtaý jáne syrtqy naryqtarda tıtan ónimderiniń básekege qabilettiligin arttyrý máseleleri qaraldy.
Oljas Bektenov ÓTMK-ni damytý Memleket basshysynyń óńdeý ónerkásibin nyǵaıtý, joǵary qaıta bólý ónimderin shyǵarý jáne Qazaqstandy jahandyq óndiristik tizbekterge engizý boıynsha qoıǵan mindetterine sáıkes keletinin atap ótti.
Aıta keteıik, Astanada taý-ken metallýrgııa salasyndaǵy eń iri halyqaralyq alańdardyń biri 16-Astana Mining & Metallurgy (AMM 2026) halyqaralyq taý-ken metallýrgııa kongresi ótip jatyr.
