Qazaqstan zeınetaqy júıesiniń ornyqtylyǵy boıynsha álemde segizinshi oryn aldy

ASTANA. KAZINFORM – Qazaqstannyń zeınetaqy júıesi Marsh CFA Institute Global Pension Index 2026 halyqaralyq zertteýinde uzaq merzimdi ornyqtylyq kórsetkishi boıynsha álemdegi úzdik on eldiń qataryna endi, dep habarlady Eńbek jáne halyqty áleýmettik qorǵaý mınıstrligi.

v
Foto: Eńbek mınıstrligi

Halyqaralyq reıtıngte Qazaqstan 74,4 ball jınap, segizinshi orynǵa ıe boldy. Bul kórsetkish zeınetaqy júıesiniń qarjylandyrý kózderin, jınaqtalǵan aktıvterdi jáne demografııalyq ózgeristerdi eskere otyryp, bolashaqta zeınetaqy tólemderin qamtamasyz etý múmkindigin baǵalaıdy.

Al jalpy reıtıngte Qazaqstan 55 eldiń arasynda 29-orynǵa turaqtady. Elimizdiń qorytyndy kórsetkishi 64,8 baldy qurap, zeınetaqy júıesine C+ baǵasy berildi.

Zertteý aıasynda sarapshylar 50-den astam kórsetkishti taldaǵan. Olar zeınetaqy tólemderiniń jetkiliktiligi, júıeniń uzaq merzimdi ornyqtylyǵy jáne ony retteý men basqarý sapasy sııaqty úsh negizgi baǵytty qamtıdy.

– Qorytyndy ball osy úsh baǵyt boıynsha alynǵan nátıjeler negizinde qalyptastyrylady. Sondyqtan jekelegen kórsetkish boıynsha joǵary baǵa zeınetaqymen qamsyzdandyrýdyń basqa baǵyttaryn odan ári jetildirý qajettigin joqqa shyǵarmaıdy. Qazaqstan úzdik ondyqqa engen ornyqtylyq kórsetkishi zeınetaqy baǵdarlamalarymen qamtylǵan jumyskerlerdiń úlesin, zeınetaqy aktıvteriniń kólemin, halyqtyń qartaıý qarqynyn jáne basqa da faktorlardy eskeredi. Bul kórsetkish zeınetkerler sany men zeınetaqy tólemderin alý uzaqtyǵy ózgergen jaǵdaıda júıeniń bolashaq mindettemelerdi oryndaýǵa qanshalyqty daıyn ekenin baǵalaýǵa múmkindik beredi, – delingen mınıstrlik aqparatynda.

Zertteýde zeınetaqy júıesin retteý men basqarý sapasyna, onyń qatysýshylarynyń quqyqtary men múddelerin qorǵaýǵa jáne azamattardy aqparattandyrýǵa da erekshe nazar aýdarylǵan.

Bul baǵytta Qazaqstan 83 ball jınady.

Sarapshylar elimizdiń kópdeńgeıli zeınetaqy júıesin de baǵalaǵan. Ol memlekettik zeınetaqy tólemderin, jumyskerler men jumys berýshilerdiń mindetti jarnalary esebinen qalyptastyrylatyn zeınetaqymen qamsyzdandyrýdy jáne erikti zeınetaqy jınaqtaryn qamtıdy.

Qazaqstannyń zeınetaqy júıesiniń basym tustary retinde jumyskerlerdiń zeınetaqy baǵdarlamalarymen keńinen qamtylýy, olardyń quqyqtary men múddelerin qorǵaý, sondaı-aq aqparattandyrý jumystary atap ótilgen.

Aıta ketý kerek, aldyńǵy zertteýde Qazaqstannyń jalpy kórsetkishi 65 baldy quraǵan. Al 2026 jyly bul kórsetkish 64,8 ball boldy.

Zertteý nátıjeleri Qazaqstannyń zeınetaqy júıesi uzaq merzimdi ornyqtylyq turǵysynan joǵary kórsetkishke ıe ekenin kórsetkenimen, zeınetaqymen qamsyzdandyrý deńgeıin odan ári arttyrý qajettigin de aıqyndady.

Aıta keteıik, 2025 jylǵy jahandyq zeınetaqy ındeksinde Qazaqstan 52 eldiń arasynda 26-oryn alyp, 65 ball jınaǵan edi. Sol jyly elimizdiń zeınetaqy júıesiniń uzaq merzimdi ornyqtylyǵy 74,2 balǵa baǵalanǵan.