Qazaqstan zańsyz júrgen qyrǵyz azamattaryn eline qaıtarý shartyn jeńildetedi
ASTANA. QazAqparat - Búgin QR Parlamenti Senaty Konstıtýtsııalyq zańnama, sot júıesi jáne quqyq qorǵaý organdary komıtetiniń jalpy otyrysy ótti.
Onda Qazaqstan Respýblıkasy Úkimeti men Qyrǵyz Respýblıkasy Úkimeti arasyndaǵy readmıtsııa týraly kelisimdi ratıfıkatsııalaý týraly zań jobasy talqylandy, dep habarlaıdy QazAqparat.
Zań jobasy boıynsha negizgi baıandama jasaǵan QR Іshki ister vıtse-mınıstri Erlan Turǵymbaevtyń aıtýynsha, Qazaqstan Respýblıkasy Úkimeti men Qyrǵyz Respýblıkasy Úkimeti arasyndaǵy readmıtsııa týraly kelisimdi iske asyrý tártibi týraly atqarý hattamasy 2016 jyldyń 17 qazanynda Astanada jasalǵan. Bul qujat eki memlekettiń aýmaǵyna kirý jáne onda bolý sharttaryn buzǵan adamdardy anyqtaýdy jáne qaıtarýdy kózdeıdi.
«Kelisim elimizdiń aýmaǵyna zańsyz kirgen nemese zańdy kirgen, biraq vızanyń nemese ruqsattyń merzimi ótip ketkennen keıin sonda qalǵan adamdardy anyqtaýdy kózdeıdi. Bul kelisim aldaǵy ýaqytta EKSPO-2017 halyqaralyq kórmesiniń ótýine baılanysty barynsha ózekti bola túsedi. Onyń aıasynda kóptegen sheteldik qonaqtar keledi dep kútilýde. Kelisimdi ratıfıkatsııalaý zańsyz kóshi-qonmen halyqaralyq talaptarǵa saı kúresýge múmkindik beredi», - dedi vıtse-mınıstr.
Onyń aıtýynsha, kelisimdi ratıfıkatsııalaý eldiń aýmaǵynda zańsyz júrgen adamdardy halyqaralyq quqyqqa sáıkes qabyldaýdy, sonymen qatar olardyń tranzıtin jeńildetýge oń áserin beredi. Bul zańdy qabyldaý teris áleýmettik-ekonomıkalyq jáne quqyqtyq saldarǵa ákep soqtyrmaıdy jáne qosymsha qarajatty talap etpeıdi.
Senatorlar zań jobasyn biraýyzdan maquldap, Senattyń jalpy otyrysyna shyǵarýǵa kelisti.
