Qazaqstan zańsyz kóshi-qonnyń aldyn alý úshin qandaı sharalar qabyldaýda
«Quqyq qorǵaý organdarynyń mindeti qoǵamdyq tártip pen qaýipsizdikti qamtamasyz etý. Qoǵam tynyshtyǵy men tutastyǵyna qaýip tóndiretin jaıttardyń biri - zańsyz kóshi-qon. Zańsyz kóshi-qon qoǵamǵa ǵana emes, eldiń áleýmettik-ekonomıkalyq damýyna da eleýli áserin tıgizedi. Sondyqtan kóshi-qonǵa baılanysty problemalar bizdiń el úshin de únemi ózekti. Osy tusta der kezinde qabyldanyp jáne ýaqytyly ózgertýler men tolyqtyrýlar engizilip otyratyn zańnama bizdiń mınıstrlik pen basqa da quzyrly organdardyń jumysyn jeńildetýde. Búginde elimizde zańsyz kóshi-qonmen kúres baǵytynda birqatar keshendi shara júrip jatyr. Sonyń biri «Mıgrant» jedel profılaktıkalyq sharasy. Onyń aıasynda turǵyn úıler men syrttan kelgen mıgranttar bolýy múmkin nysandardyń barlyǵy tekseriledi», - dedi Murat Baımuqashev QR Parlamenti Májilisinde jasaǵan baıandamasynda.
Sondaı-aq, vıtse-mınıstr zańsyz kóshi-qonmen kúreste ujymdyq qaýipsizdik týraly shart uıym elderi aýmaǵynda jyl saıyn «Nelegal» arnaıy operatsııasy ótip turatynyn aıtty. Atalǵan uıymǵa Qazaqstan, Reseı, Armenııa, Belarýs, Qyrǵyzstan jáne Tájikstan kiredi.
«Sońǵy ýaqytta zańsyz kóshi-qonǵa qarsy is-qımylda readmıssııa degen júıeni paıdalana bastadyq. Ol degenimiz elimizde zańsyz júrgen mıgrantty halyqaralyq kelisim boıynsha otanyna qaıtarý. Readmıssııanyń mehanızmi qarapaıym, óıtkeni shetel azamatyn eline qaıtarý úshin sot sheshimi talap etilmeıdi. Búginde Qazaqstan men 16 memleket arasynda readmıssııa týraly kelisim ratıfıkatsııalandy. Taıaýda taǵy 15 memleketpen kelisimge kelý pysyqtaý satysynda tur», - deıdi mınıstrdiń orynbasary.
Buǵan deıin M. Baımuqashev sheteldik eńbek mıgranttary esebinen el bıýdjetine 30 mlrd teńgege jýyq qarjy túskenin málim etken bolatyn.
Odan bólek, vıtse-mınıstr búginde Qazaqstannyń qansha elmen vızasyz rejım ornatqany týraly aıtyp berdi.
Aıta keteıik, búgin QR Parlamenti Májilisiniń zańnama jáne sot-quqyqtyq reforma komıtetinde QR keıbir zańnamalyq aktilerine halyqtyń kóshi-qony salasyndaǵy zańnamany jetildirý máseleleri boıynsha ózgerister men tolyqtyrýlar engizý týraly zań jobasynyń tanystyrylymy ótti.
Atalǵan sharaǵa Májilis depýtattary men qatar quzyrly organ ókilderi qatysty.
