Qazaqstan zańnamasyna «zańsyz baıý» týraly uǵymdy engizý kerek - S. Aqylbaı
ASTANA. QazAqparat - Elimizdiń ulttyq zańnamasyna «zańsyz baıý» týraly uǵymdy engizý kerek. Búgin Senattyń jalpy otyrysynda depýtat Serik Aqylbaı osy máseleni kóterdi.
Jıyn barysynda depýtat S. Aqylbaı Elbasy aıqyndaǵan «100 naqty qadam» Ult josparyn júzege asyrýǵa toqtala kele, ondaǵy 42-qadamda «tabystar men múlikti jalpy deklaratsııalaý» máselesine nazar aýdardy. Onyń aıtýynsha, 2017 jyly jalpy deklaratsııalaý memlekettik kásiporyndardyń, mekemelerdiń, ulttyq kompanııalardyń qyzmetkerlerine, jalpy alǵanda 1,7 mln adamǵa qatysty bolady. Al 2020 jylǵa qaraı barlyq jeke tulǵalarǵa deklaratsııasy mindetti bolady.
«Osyǵan oraı, deklaratsııaǵa qatysty zańnamadaǵy jaýaptylyq tolyq kórsetilmegen. Ákimshilik quqyq buzýshylyq týraly kodekste tek jalǵan málimetterge ǵana kózdelgen. Jazaǵa tartylý múmkindigin keńeıtý úshin ulttyq zańnamamyzda «zańsyz baıý» degen uǵymdy engizý qajet dep esepteımin. Bul rette zańsyz baıý negizinen zańdy talaptardan asyp túsetin múlik qunynyń aıtarlyqtaı ulǵaıýy retinde anyqtalady. Osyǵan baılanysty laýazymdy tulǵa aıyrmashylyqty quraıtyn qarajattyń shyǵý kózin rastaı almasa, onda ony jaýapqa tartý kerek. ıAǵnı, sybaılas jemqorlyq qubylysy budan bilinedi degen sóz», - deıdi S. Aqylbaı.
Onyń aıtýynsha, zańsyz baıýdy dáleldeý - basqa sybaılas jemqorlyq qylmystardy dáleldeýge qaraǵanda anaǵurlym jeńil. Bul rette quqyq qorǵaý organdary baıý aýqymy tulǵanyń zańdy tabysynan asyp túsetin qarajatty dáleldeýge mindetti bolady.
«Halyqaralyq tájirıbege júginetin bolsaq, bul norma Argentınada 1966 jyldan, Gongkongta 1974 jyldan, Úndistanda 1988 jyldan, Qytaıda 1999 jyldan, al Lıtvada 2013 jyldan bastap engizilgen. Bul norma sybaılas jemqorlyqqa qarsy turý deńgeıin arttyryp, qoǵamnyń quqyqtyq sanasyn nyǵaıtady», - dedi senator Serik Aqylbaı.
