Qazaqstan zańgerleri Sultan Sartaevty 90 jasqa tolýymen quttyqtady
ALMATY. QazAqparat - Áıgili zańger, QR Ulttyq ǵylym akademııasynyń akademıgi Sultan Sartaevtyń 90 jasqa tolǵanyna oraı, Almatyda Qazaqstan zańgerleriniń basyn qosqan ǵylymı jıyn ótti, dep habarlaıdy QazAqparat tilshisi.
Akademıktiń 90 jasyna oraı uıymdastyrylǵan «Qazirgi kezdegi Qazaqstandaǵy quqyq júıesindegi damýdyń ózekti máseleleri atty» halyqaralyq ǵylymı-teorııalyq konferentsııa ál-Farabı atyndaǵy Qazaq Ulttyq Ýnıversıtetinde ótti.
Qazaqstan táýelsizdiginiń irge tasyn qalaýshylardyń biri - Sultan Sartaevtyń quttyqtaýǵa onyń shákirtteri, búgingi túrli laýazymdy qyzmetter atqaryp otyrǵan belgili zańgerler jınaldy. Ár memleketten, tanymal tulǵalardan kelgen quttyqtaý hattar oqyldy. Memleket basshysy Nursultan Nazarbaevtyń quttyqtaý hatyn QR Prezıdenti ákimshiligi basshysynyń orynbasary Talǵat Donaqov oqyp berdi.
«Qurmetti Sultan Sartaıuly, sizdi 90 jasqa tolǵan mereıtoıyńyzben quttyqtaımyn. Halqymyz ózińizdi Qazaqstan zań ǵylymynyń kórnekti ókili, ulaǵatty ustaz jáne belgili qoǵam qaıratkeri retinde qadirleıdi. Siz ondaǵan jyldar boıy joǵary oqý oryndarynda sabaq berip, basshylyq jasap, bolashaq zańgerler men osy salaǵa arnap ǵylymı kadrlar tárbıeledińiz. Kemel bilimińiz, mol tájirıbeńizben zor bedelińizdiń arqasynda elimizdiń Joǵarǵy keńesiniń depýtaty bolyp, Táýelsiz Qazaqstannyń memlekettik quqyq júıesin qalyptastyrý men damytý isine súbeli úlesińizdi qostyńyz. Zańgerlerdiń halyqaralyq mártebeli jıyndarynda el atynan sóz alyp, ózińizdi álemdik deńgeıdegi ǵalymdardyń biri retinde tanyttyńyz. Qajyrly eńbegińiz ár jyldary eń joǵary ǵylymı marapattarmen jáne birqatar memlekettik nagradalarmen atap ótildi. Sizdiń ónegeli eńbek jolyńyzben el ıgiligine arnap atqarǵan isterińiz ósip kele jatqan urpaqtar úshin árdaıym jaqsy úlgi bolyp qala beredi dep oılaımyn», - dep jazylǵan Elbasy N.Nazarbaev quttyqtaýynda.
Ǵylymı konferentsııada QR Parlamenti Senatynyń tóraǵasy Qasym-Jomart Toqaevtyń quttyqtaý hatyn Senat apparatynyń basshysy Serik Sydyqov oqyp berdi. Sondaı-aq, jıynda QR Parlament májilisiniń tóraǵasy Nurlan Nyǵmatýllınniń quttyqtaý haty da oqyldy. Ony QR Parlamenti Májilisiniń zańnama jáne sottyq-quqyqtyq reformalar jónindegi komıtetiniń tóraǵasy Nurlan Ábdirov tanystyrdy. 
Mereıtoıy ıesin quttyqtaýǵa Astanadan birqatar laýazymdy tulǵalar da kelip, óz estelikterimen bólisti.
Atap aıtqanda, QR Konstıtýtsııalyq keńesiniń tóraǵasy Igor Rogov, QR Bas prokýrory Jaqyp Asanov akademıkten dáris alǵan stýdenttik kezderindegi estelikterimen bólisti.
«Konstıtýtsııalyq keńes qyzmetkerleriniń deni Sultan Sartaevtyń shákirtteri. Sultan Sartaevtyń QazSSR-niń táýelsizdik týraly dekloratsııasy, Qazaqstannyń memlekettik táýelsizdigi týraly konstıtýtsııalyq zań, Qazaqstandaǵy tilder týraly, Qazaqstan azamattyǵy, Qazaqstannyń 1993, 1995 jyldardaǵy Konstıtýtsııalaryna ázirleý sııaqty elimzdiń tarıhyndaǵy taǵdyr sheshti qujattardyń basy-qasynda bolý erekshe atap ótýimiz qajet», - degen Igor Rogov Konstıtýtsııalyq keńes atynan S.Sartaevqa «Konstıtýtsııaǵa adal qyzmeti» úshin belgisin tabys etti.
Akademık jıynǵa qatysýshylarǵa alǵysyn bildirdi.
«Zań ǵylymynyń aqsaqaldaryna, búgingi jıynǵa qatysýshy, belgili sebepterge baılanysty qatysa almaǵandardyń barlyǵyna alǵysymdy bildiremin. Ál-Farabı atyndaǵy QazUÝ ujymynda qyzmet etetimen maqtanamyn. Ár tanymal adam ózinen ózi tanymal bolmaıdy. Sizdeı adamdardyń qoldaýymen tanymal bolady. Osyndaı shynaıy yqylastaryńyzǵa alǵys aıtamyn. Meniń jasyma jetińizder», - dedi akademık.
Jıynda S.Sartaevtyń 90 jyldyǵyna arnalǵan «Akademık S.Sartaev ı ego vklad v razvıtıe gosýdarstvenno-pravavoı sıstemy Respýblıkı Kaazahstan: proshloe, nastoıaşee, býdýşee» dep atalatyn kitaptyń tusaýy kesildi.
