«Qazaqstan zańgerler odaǵy» Konstıtýtsııa jobasyn búkilhalyqtyq referendýmǵa shyǵarý usynysyn qoldady

ASTANA. KAZINFORM — «Qazaqstan zańgerler odaǵynyń» tóraǵasy Serik Aqylbaı Konstıtýtsııa jobasyn búkilhalyqtyq referendýmǵa shyǵarý usynysyna qoldaý bildirdi.

— Kúni keshe «Qazaqstan zańgerler odaǵynyń» bazasynda elimizdiń barlyq óńirin qamtyǵan sýdıalar korpýsyn, notarıattardy, jeke sot oryndaýshylaryn, zań keńesshilerin jáne ǵylymı qaýymdastyqty biriktirgen keńeıtilgen sarapshylyq talqylaý ótkizdik. Talqylaý barysynda kásibı orta Konstıtýtsııa jobasyn jekelegen túzetýler jıyntyǵy emes, Ata zańnyń tujyrymdamalyq turǵydan jańarǵan úlgi retinde baǵalady. Ásirese, adam quqyqtary men bostandyqtaryn qorǵaýdy kúsheıtý, tsıfrlyq keńistiktegi quqyqtyq kepildikterdi bekitý, bilim berý men ǵylymdy damytý, sondaı-aq memlekettiń zaıyrly sıpatyn naqtylaý máseleleri keń qoldaýǵa ıe boldy, — dedi ol Konstıtýtsııalyq reformalar jónindegi komıssııanyń kezekti otyrysynda.

Onyń aıtýynsha, bul usynystar zańgerlik qaýymdastyqtarmen ǵana emes, azamattardyń da naqty suranysymen úndesip otyr.

— Sonymen qatar azamattardan túsken oryndy usynystar da nazardan tys qalyp jatqan joq. Olardyń edáýir bóligi jumys toptarynda talqylanyp, jobaǵa engizildi. Bul — qoǵam men memlekettiń ashyq ári syndarly dıalogynyń aıqyn kórinisi. Sondyqtan men jobany búkilhalyqtyq referendýmǵa shyǵarý jónindegi komıssııa músheleriniń usynystaryn qoldaımyn, — dedi Serik Aqylbaı.

Budan buryn Memlekettik keńesshi Erlan Qarın qoldanystaǵy Konstıtýtsııa mátinine qatysty ǵalymdardyń usynysyna qatysty pikir aıtty.