Qazaqstan zańgerler klýby qurylatyn bolady

Bul týraly búgin Parlament Májilisinde «Men Qazaqstan zańnamasynda neni ózgerter edim? Nege? Bul elimizge ne beredi?» atty respýblıkalyq konkýrstyń jeńimpazdaryn saltanatty marapattaý rásimi barysynda málim boldy. Eske sala keteıik, atalǵan konkýrs Qazaqstan Respýblıkasy Parlamenti Májilisi Tóraǵasynyń orynbasary Darıǵa Nazarbaevanyń jáne Qazaqstandaǵy iri aqparattyq portal «Zakon. kz» bastamashylyǵymen ótken bolatyn.

«Respýblıkalyq konkýrs bazasynda zańgerler klýbyn qurý týraly bastamalar kóterilip otyr. Bul klýb tıimdi saraptamalyq taldaý ortalyǵyna jáne zań shyǵarýshylar men qarapaıym azamattar arasyndaǵy suhbattyq alańǵa aınalsa ıgi. Klýb aıasynda Parlamentte qaralatyn zań jobalardy keńinen talqylaý usynylady», - dedi «Zakon. kz» aqparattyq portalynyń negizin qalaýshy Sergeı Kıselev. Onyń aıtýynsha, klýb jumysyn ınternet arqyly onlaın jelisinde de, sonymen qatar basqa da túrli sharalar men basqosýlar ótkizý arqyly jandandyrý da kózdelip otyr. Bundaı ıdeıany konkýrs uıymdastyrýshylary men qatysýshylary biraýyzdan qoldady.

Májilis vıtse-spıkeri Darıǵa Nazarbaeva klýbty qurý týraly bastamaǵa rızashylyǵyn tanytty. «Biz shyndyǵynda Parlamentte udaıy tyń ıdeıalardy izdeý ústindemiz. Bul - bizge jetispeıtin dúnıe, al qoǵam tarapynan usynystar men ıdeıalar túsip tursa, ondaı usynystardy talqylaıtyn alań bolsa, bul bizdiń jumysymyzdyń nátıjeliligi úshin mańyzdy. Sondyqtan da, klýb qurý osy olqylyqty toltyra túspek», - dedi D. Nazarbaeva.

Budan bólek, sóz arasynda Májilis vıtse-spıkeri respýblıkalyq konkýrstyń mańyzy men maqsatyna da toqtalyp ótti. «Konkýrstyń basty maqsaty - azamattyq zań shyǵarmashylyq bastamalardy damytý, bul saladaǵy qoǵam ókilderiniń úzdik jetistikterin yntalandyrý. Eń bastysy, bul shara elimizdegi zańgerler qaýymdastyǵynyń kásibıligin arttyryp, jalpy jurtshylyqtyń quqyqtyq sanasy men quqyqtyq mádenıetin qalyptastyrýǵa járdemdesedi dep senemiz. Sonymen qatar, konkýrs zań shyǵarýshylar men qarapaıym azamattar arasynda tıimdi dıalog alańyna aınalsa ıgi», - deıdi Májilistiń vıtse-spıkeri Darıǵa Nazarbaeva.

Onyń aıtýynsha, ekologııalyq-ekonomıkalyq kúrdeli jaǵdaılar, jahandyq qarjylyq jáne taýarlyq naryqtaǵy turaqsyzdyq zań shyǵarýshylar aldynda da jańa qaterler týdyryp otyr. «Bizder keshe qabyldaǵan zańdarymyz shapshań eskirip jatyr. Árıne, mundaı jaǵdaıda biz úshin jańa kózqarastar, problemalarǵa jańa qyrynan kelý, olardyń sheshý joldary boıynsha tyń ıdeıalar men usynystardyń bolýy mańyzdy. Al onyń sheshimi bılik pen el jurtshylyǵynyń ózara árekettestigi arqyly ǵana júzege asady», - dedi D. Nazarbaeva.

Esterińizge sala keteıik, Qazaqstan Respýblıkasy Parlamenti Májilisi Tóraǵasynyń orynbasary Darıǵa Nazarbaeva jáne Qazaqstandaǵy iri aqparattyq portal «Zakon. kz» bastamashylyǵymen ótken konkýrstyń bas júldesi Gúljazıra Aqtóreqyzy Ilıasovaǵa buıyryp, ol 1,5 mıllıon teńgege ıelendi. Qomaqty aqshalaı qarajattary bar júldeli úsh orynnan bólek elimizdiń áleýmettik-mádenı damýyn zańnamalyq retteý, azamattyq quqyq, aqparattyq quqyq baǵytyndaǵy úzdik jumystar atalymdary boıynsha da syılyqtar taǵaıyndalyp, avtorlar marapattalǵan bolatyn.