Qazaqstan zańdaryn Eýroodaq standarttaryna jaqyndatýǵa daıyndalyp jatyrmyz - Bektas Muhamedjanov
ALMATY. Sáýirdiń 23-i. QazAqparat /Erlik Erjanuly/ - Qazaqstan men Slovakııa sarapshylary Qazaqstan zańdaryn Eýroodaq standarttaryna jaqyndatý úshin jarty jyldan beri birlesken joba ázirleýge daıyndalyp jatyr.
Bul búgin Almatyda ótip jatqan "Qazaqstannyń eýropalyq perspektıvasy: seriktestiktiń jańa kezeńderi" dep atalatyn halyqaralyq konferentsııada aıtyldy, dep habarlaıdy QazAqparat.
Ony QR Tuńǵysh Prezıdenti janyndaǵy Álemdik ekonomıka jáne saıasat ınstıtýty uıymdastyrdy. Bul shara eýropalyq áriptestermen "Áleýmettik standarttardy beıimdeý: Eýropanyń Qazaqstan úshin tájirıbesi" jobasy aıasynda ótip jatyr.
"Qazaqstan densaýlyq saqtaý, bilim berý salalarynda reformalar júrgizip jatyr. Onda Eýropada iske asqan áleýmettik standarttardy engizý múmkindigi bar. Búgingi konferentsııada burynǵy sotsıalıstik elderdiń ózderiniń ulttyq zańdaryn tez arada Eýropa zańdaryna qalaı sáıkestendirgeni jáne ondaǵy Slovakııa tájirıbesi qaralyp jatyr. Qazir olar ózderiniń áleýmettik standarttaryn joǵary deńgeıge jetkizdi. Sondyqtan da konferentsııa sońynda slovakııalyq áriptesterimizben birlesip, jaqyn arada úkimetke Qazaqstannyń qaı zańdaryn ózgertip Eýropa standarttaryna jaqyndatýdyń jobasyn jasap, onyń kestesin ázrleý múmkindigin talqylaımyz", deıdi QR Tuńǵysh Prezıdenti qorynyń Atqarýshy dırektory Bektas Muhamedjanov. Onyń aıtýynsha, olardyń bul jobaǵa ázirlikti bastaǵanyna jarty jyldan asty. Sondyqtan qazir birqatar máselelerde kelisimge kelip otyr. Endi aldaǵy 1-2 kúnde bul kelisimderdi qaǵazǵa túsirip, qarjy máselelerin sheshken soń aldaǵy kúzden kelesi jyldyń kóktemine deıin úkimetke usynatyn naqty usynystaryn ázirleýge múmkindikteri bar.
