Qazaqstan ıÝNESKO tizimine jańa mura nysandaryn usyndy

Onyń jeke bólimi «Álem jady» baǵdarlamasy sheńberindegi derekti muraǵa arnalǵan. ıÝNESKO tizimine qandaı nysandar engizilgeni jáne Qazaqstannan qandaı nomınatsııalar jiberilgeni týraly Ulttyq akademııalyq kitaphanasynyń dırektory Kúmis Seıitova aıtyp berdi.

Onyń aıtýynsha, búgingi tańda Qazaqstan ıÝNESKO-nyń «Álem jady» halyqaralyq tizilimine tórt derekti mura usynyp otyr. Olardyń qatarynda Qoja Ahmet ıAssaýıge, «Nevada — Semeı» halyqaralyq antııadrolyq qozǵalysyna qatysty materıaldar men Aral teńizine arnalǵan derekti mura, sondaı-aq ótken jyly tizimge engizilgen «Handar shejiresi» bar.

Endi qazir Qazaqstan halyqaralyq tizilimge jańa nomınatsııalar joldady. Olardyń arasynda Abaı Qunanbaevtyń shyǵarmalarymen baılanysty derekti mura, sondaı-aq «Qyz Jibek» atty alǵashqy qazaq operasy boıynsha materıaldar bar.

Sonymen qatar Qazaqstan ıÝNESKO-nyń Ortalyq Azııa men Azııa-Tynyq muhıty óńiri elderine arnalǵan óńirlik tizilimine de qatysyp jatyr. Óńirlik tizimge eki qujat — Esik qorǵanynan tabylǵan Esik tostaǵanyndaǵy rýna jazýlary men Máshhúr Júsip shyǵarmalaryna baılanysty qujattar jiberildi.

Sondaı-aq 2025 jyly Ulttyq komıtet alǵash ret «Álem jady» derekti murasynyń ulttyq tizimin jasap, bekitti.

— Búginde oǵan 79 nysan kiredi. Aldaǵy ýaqytta tizimdi 500-ge deıin keńeıtý josparda bar, óıtkeni Qazaqstanda osy tizimde bolýǵa laıyqty 6 myńǵa jýyq derekti mura nysany bar, — dep atap ótti Kúmis Seıitova.

Onyń aıtýynsha, aldaǵy ýaqytta ıÝNESKO-ǵa jańa nomınatsııalar osy Ulttyq tizimnen alynyp usynylatyn bolady. Bul rette, uıymnyń qaǵıdalaryna sáıkes árbir el halyqaralyq jáne óńirlik tizilimderge engizý úshin eki jylda bir ret bir nysannan ǵana ótinish bere alady.

Óńirlik tizimge ótinimderdi qaraý nátıjeleri 2026 jyldyń birinshi jartyjyldyǵynda belgili bolady, al halyqaralyq tizilimge ótinimder kelesi jyly qaralady.

Aıta ketelik elde mádenı murany saqtaýdyń 2026–2028 jyldarǵa arnalǵan keshendi jospary bekitilgen edi.