Qazaqstan ıadrolyq qarýdy joıý bastamalarynda kósh bastap keledi – sarapshy
ASTANA. KAZINFORM – Jenevada Qazaqstannyń BUU bólimshesi jáne basqa da halyqaralyq uıymdar janyndaǵy Turaqty ókildiginiń bastamasymen ıAdrolyq synaqtarǵa qarsy halyqaralyq is-qımyl kúnine jáne Semeı ıadrolyq synaq polıgonynyń jabylǵanyna 35 jyl tolýyna arnalǵan Beıbitshilik marshy ótti.
Іs-shara Qazaqstan men BUU-nyń #StepUp4Disarmament («Qarýsyzdaný jolyndaǵy naqty qadamdar») jahandyq bastamasy aıasynda uıymdastyryldy.
Kazinform agenttiginiń menshikti tilshisi sporttyq-qoǵamdyq sharaǵa qatysýshylardyń biri, «Parlamentarııler ıadrolyq qarýdy taratpaý jáne qarýsyzdaný jolynda» uıymynyń ókili Alın Ýermen (Alyn Ware) suhbattasty.
Jańa Zelandııadan shyqqan, búginde Shveıtsarııada turatyn sarapshy 29 tamyzdyń ıadrolyq synaqtardan zardap shekkenderdi eske alý kúni ǵana emes, ıadrolyq qarýdan azat álem qurý qajettigin taǵy bir márte uǵyndyratyn mańyzdy data ekenin atap ótti.
– Bul kún Qazaqstannyń bastamasymen bekitildi. Qazaqstan qyrǵı-qabaq soǵys jyldarynda 450-den astam ıadrolyq synaqty bastan ótkerdi. Sondyqtan qazaqstandyqtar radıatsııanyń, onyń qorshaǵan orta men adam densaýlyǵyna tıgizetin apatty zardaptarynyń ne ekenin óz tájirıbesinen jaqsy biledi. Tynyq muhıty aımaǵynda da ıadrolyq synaqtar júrgizilgen. Sol sebepti biz Qazaqstannyń ıadrolyq qarýdy joıýǵa baǵyttalǵan ustanymyn tolyq qoldaımyz, – dedi Alın Ýer.
Beıbitshilik marshyna qatysýshylar 8,29 shaqyrym qashyqtyqty júrip ótedi. Bul san 29 tamyz – ıAdrolyq synaqtarǵa qarsy halyqaralyq is-qımyl kúnin bildiredi. Marsh Jenevadaǵy Birikken Ulttar Uıymynyń ǵımaratynan bastalyp, mańyzdy halyqaralyq beıbit kelissózder ótken «La Grand» vıllasyna deıin jalǵasyp, keıin qatysýshylar BUU ǵımaratyna qaıta oralady.
Sarapshynyń pikirinshe, Qazaqstan ıadrolyq qarýdyń zardaptaryn óz basynan ótkergen el retinde búginde jahandyq qarýsyzdaný isinde mańyzdy ról atqaryp otyr.
– Qazaqstan ıadrolyq qarýdy qoldanýdyń saldaryn jáne ony kez kelgen jaǵdaıda paıdalanýdyń maǵynasyz ári adamgershilikke jat ekenin jaqsy túsine otyryp, ıadrolyq qarýdy joıý jónindegi bastamalardyń kóshbasshysyna aınaldy. Buǵan Ortalyq Azııada ıadrolyq qarýdan azat aımaq qurý, sondaı-aq BUU aıasynda ıadrolyq qarýdy tolyq joıýǵa baǵyttalǵan kelissózderge jetekshilik etý kiredi, – dedi ol.
Alın Ýer Ortalyq Azııadaǵy ıadrolyq qarýdan azat aımaqty Tynyq muhıtynyń ońtústik bóligindegi ıadrolyq qarýdan azat aımaqpen salystyryp, mundaı bastamalardyń jahandyq qaýipsizdikti nyǵaıtýdaǵy mańyzyn atap ótti.
Aıta keteıik, Memleket basshysy ıAdrolyq synaqtarǵa qarsy halyqaralyq is-qımyl kúnine oraı úndeý jasady.
