Qazaqstan XXV qysqy Olımpıadada sportshylar sany jóninen 24-orynǵa turaqtady

ASTANA. KAZINFORM - Búgin Italııada bastalatyn XXV qysqy Olımpıada oıyndarynda Qazaqstan sportshylar sany jóninen alǵashqy 25 memleket quramyna endi.

2026 jylǵy 6-22 aqpan aralyǵynda ótetin dúbirli dodada álemniń 90-nan astam elinen shamamen 2 900-3 500 sportshy qatysady dep kútiledi. Baıraqty básekede 16 sport túri boıynsha 116 medal jıyntyǵy sarapqa salynady.

Dúbirli dodaǵa úzdikterin attandyrǵan elderdiń arasynda AQSh quramasy 233 sportshymen kósh basynda tur. Ekinshi orynǵa 210 atletpen Kanada jaıǵassa, Italııa 196 sportshymen úzdik úshtikti túıindedi.

Sondaı-aq bedeldi básekege Germanııa, Shveıtsarııa, Frantsııa, Qytaı, Japonııa, Aýstrııa jáne ózge de birqatar el 100-den astam úzdigin attandyrdy.

Elimiz bıyl qysqy Olımpıada oıyndarynda 36 sportshyǵa úmit artyp, jalpy tizimde 24-orynǵa taban tirep otyr. Dúbirli dodada elimizdiń ulttyq quramasy sporttyń 10 túrinen 58 medal jıyntyǵy boıynsha baq synaıdy. Olardyń qatarynda bıatlon, konkımen júgirý, mánerlep syrǵanaý, short-trek, taý shańǵy sporty, shańǵy qossaıysy, shańǵy jarystary, shańǵymen tramplınnen sekirý, frıstaıl-mogýl jáne frıstaıl-akrobatıka bar.

Sondaı-aq Qazaqstan quramasynyń ortasha jasy – 25. Eń jas sportshy – frıstaıl-akrobatıkadan synǵa túsetin 16 jastaǵy Asan Asylhan. Al eń tájirıbeli sportshy – short-trekshi 33 jastaǵy Abzal Ájǵalıev. Quramadaǵy eń ataqty sportshy – frıstaıl-mogýldan baq synaıtyn ıÝlııa Galysheva.

Al Orta Azııa elderiniń arasynda Ózbekstan men Qyrǵyzstan eki-ekiden úzdigin qosty.

Dúbirli dodada 16 memleket nebári bir sportshy senim bildirdi.

Qazaqstandyq kórermender búgin XXV qysqy Olımpıada oıyndarynyń saltanatty ashylý rásimin Astana ýaqyty boıynsha saǵat 23:50-den bastap Jibek Joly telearnasynyń tikeleı efırinen tamashalaı alady.