Qazaqstan volonterlik boıynsha 34 kelisim jasasty
ASTANA. KAZINFORM — Qazaqstan halyqaralyq volonterlik yntymaqtastyq aıasyn keńeıtip, álemniń túrli óńirindegi eldermen 34 kelisim jasasty. Sońǵy jyldary Astanada birqatar halyqaralyq forým ótip, elimiz Ortalyq Azııa men TMD keńistigindegi volonterlik bastamalardyń mańyzdy alańyna aınaldy. Bul týraly Mádenıet jáne aqparat mınıstrligi málim etti.
Vedomstvonyń málimetinshe, Qazaqstan volonterlik boıynsha halyqaralyq yntymaqtastyqty júıeli túrde keńeıtip keledi. Búginde elimiz álemdik qozǵalysqa belsendi qatysyp, osy baǵyttaǵy halyqaralyq is-sharalardyń mańyzdy ortalyqtarynyń birine aınaldy.
Qazaqstannyń volonterlik baǵytta Ortalyq Azııa, Eýropa, Taıaý Shyǵys, Shyǵys jáne Ońtústik-Shyǵys Azııa, sondaı-aq Afrıka elderimen áriptestik ornatqan. Barlyǵy 34 kelisim jasalǵan. BUU Volonterler baǵdarlamasymen, TMD jáne Azııadaǵy ózara is-qımyl jáne senim sharalary jónindegi keńespen (AÓSShK) ornatylǵan yntymaqtastyqtyń mańyzy aıryqsha.
Elimizdiń alǵashqy bastamalarynyń biri — 2022 jylǵy tamyzda Astana, Túrkistan jáne Býrabaıda ótken Ortalyq Azııa volonterler forýmy. Іs-sharaǵa Qazaqstan, Qyrǵyzstan, Tájikstan, Túrikmenstan, Ózbekstan, Ázerbaıjan jáne Armenııadan 600-den astam delegat qatysty.
Forýmda BUU-nyń turaqty damý maqsattaryna qol jetkizýge volonterliktiń qosatyn úlesi men ony damytý joldary talqylandy.
2023 jyly Astanada 30 elden 400-den astam delegattyń qatysýymen halyqaralyq forým ótti. Jıyndaǵy negizgi taqyryptar — memleket pen qoǵamdyq ınstıtýttar arasyndaǵy baılanysty nyǵaıtý jáne tótenshe jaǵdaılar kezinde volonterlerdiń kómek kórsetýi.
2024 jylǵy qazanda elordada AÓSShK-ge múshe memleketterdiń volonterlik qozǵalys kóshbasshylarynyń sleti uıymdastyryldy. Slet jumysyna 21 elden 450-den astam delegat qatysty. Іs-sharanyń aýqymy halyqaralyq qaýymdastyqtyń Qazaqstandaǵy volonterlik bastamalarǵa qyzyǵýshylyǵy artyp kele jatqanyn kórsetti.
Slet aıasynda AÓSShK Jastar keńesiniń otyrysy da ótti. Kezdesý Astananyń Botanıkalyq baǵyndaǵy ekologııalyq aktsııamen jalǵasyp, 200 volonter 100-den astam aǵash otyrǵyzdy.
Halyqaralyq volonterlik yntymaqtastyqty damytýda 2026 jyldyń máni erekshe. Prezıdent Qasym-Jomart Toqaevtyń bastamasymen BUU 2026 jyldy turaqty damý maqsatyndaǵy Halyqaralyq volonterler jyly dep jarııalady.
Memleket basshysynyń taǵy bir mańyzdy bastamasy — TMD elderi volonterleriniń forýmy. Alǵashqy forým 20-21 tamyzda Astanada ótti. Іs-sharaǵa Qazaqstan, Ázerbaıjan, Belarýs, Qyrǵyzstan, Reseı, Tájikstan jáne Ózbekstannan 300-ge jýyq delegat qatysty.
Forýmda ınklıýzıvti, ekologııalyq jáne korporatıvtik volonterlikti damytý, áleýmettik jaýapkershilikti nyǵaıtý, mádenı murany saqtaý jáne halyqaralyq áriptestikti keńeıtý máseleleri qaraldy.
Qatysýshylar kásibı jáne salalyq volonterlikti damytý, kóshbasshylar men úılestirýshilerdi daıarlaý, volonterlik jumysta zamanaýı tsıfrlyq quraldardy qoldaný jóninde de pikir almasty.
Forým qorytyndysynda yntymaqtastyq týraly ortaq qarar qabyldandy. TMD volonterleriniń ІІ forýmyn 2027 jyly Mınskide ótkizý josparlanǵan.
Astanadaǵy forým Dostastyq elderiniń volonterlik boıynsha turaqty yntymaqtastyǵyna negizi boldy.
