Qazaqstan voleıbolshylary tuńǵysh ret klýbtyq Álem chempıonatyna qatysady
ASTANA. QazAqparat - Shyǵysqazaqstandyq «Altaı» klýby álemdik voleıbol sportynda eń bedeldi sanalatyn jarysqa qatysý quqyǵyn ıelendi, dep habarlaıdy QazAqparat tilshisi.
«Óskemende klýbtyq Azııa chempıonaty alǵash ret byltyr ótkizilip, saıystyń joǵary dárejede ótýine zor baǵa berilgen edi. Osyny eskere kele Halyqaralyq voleıbol konfederatsııasy (AVC) bıyl da dúbirli dodany qabyldaýǵa senim bildirgen bolatyn. Chempıonat barysyna Halyqaralyq voleıbol federatsııasynyń (FIVB) atqarýshy komıteti keńesiniń múshesi Stav ıAkobı qatysqan edi. Qurlyq dodasy máresine jetkennen keıin aımaq basshysy Danıal Ahmetov atalmysh Federatsııaǵa klýbtyq áıelder komandalary arasyndaǵy Álem chempıonatyna «Altaıdy» qatystyrýǵa nıet bildirdi. Osy oraıda, FIVB basshylyǵy Azııa chempıonatynyń oıdaǵydaı ótkizilýine kóńili tolyp, oblys ákiminiń nıetin quptady. Sondaı-aq bedeldi básekede baq synaýǵa wild card-ty tabystady», - dedi ShQO Dene shynyqtyrý jáne sport basqarmasynyń basshysy Asqar Mojanov Óskemende ótken baspasóz máslıhatynda.
Aıta keterligi, chempıonatqa qurlyqtyq konfederatsııadan barlyǵy úzdik on ujym qatysa alady. Sonymen qatar FIVB-tyń shaqyrtýymen wild card-qa ıe bolǵan taǵy eki komanda baq synaıdy. Onyń biri - «Altaı» voleıbol klýby.
ShQO Dene shynyqtyrý jáne sport basqarmasynyń baspasóz qyzmetinen málim etkendeı, Álem chempıonatyna komanda jasaqtaý jumysy bastalyp ketti. Biraq daıyndyq jattyǵýlary áli bastalǵan joq. Onyń sebebin «Altaı» voleıbol klýbynyń bas bapkeri ıÝrıı Panchenko aıtyp berdi.
«Qazirgi jaǵdaıymyz sál qyzyq bolyp tur. Klýb oıynshylarynyń basym kóbi el quramasynda óner kórsetip júr. Sondyqtan Álem chempıonatynyń irikteý oıyndarynyń aıaqtalýyn kútýdi jón sanap otyrmyz. Osydan baryp, qaı oıynshylarǵa ıek arta alatynymyz belgili bolmaq. Eń aldymen Qazaqstan kýbogine qatysyp, Ulttyq lıganyń birinshi týrynda oınaýymyz kerek. Osydan keıin tyńǵylyqty daıyndyq júrgizetin bolamyz. Odan bólek, Túrkııada jattyǵý jumystaryn júrgizý oıda bar. Quramnyń naqty múshelerin aldaǵy ýaqytta aıtamyz, oǵan deıin áli ýaqyt bar», - dedi bas bapker.
Aıta ketsek, Shyǵys Qazaqstan oblysynyń basshysy Danıal Ahmetovtyń bastamasymen 2015 jyly qurylǵan «Altaı» klýby el voleıboly tarıhynda klýbtyq komandalar arasyndaǵy Álem chempıonatyna tuńǵysh ret qatysqaly otyr. Áıelder klýbtary arasyndaǵy báseke 1991 jyldan bastap qolǵa alynyp, 2010 jyldan beri dástúrli túrde ótkizilip keledi. Munyń aldynda aýqymdy jarysty Brazılııa (1991, 1994 j), Italııa (1992j), Katar (2010, 2012 j), Shveıtsarııa (2013, 2015 j), Fılıppın (2016) jáne Japonııa (2017) elderi qabyldaǵan eken. Osy jarysta Brazılııa (1991, 1994, 2012 j), Italııa (1992 j), Ázerbaıjan (2011 j), Reseı (2014 j) jáne Túrkııa (2010, 2015, 2017 j) ala dopshylary altyn medal ıemdengen.
2018 jylǵy klýbtyq áıelder komandalary arasyndaǵy Álem chempıonaty 2-10 jeltoqsan aralyǵynda Qytaıdyń Chjetszıan aımaǵynda ótetin bolady.
