Qazaqstan vırýs «juqtyrǵan» kompıýterleri kóp bes eldiń qatarynda
ASTANA. 31 naýryz. QazAqparat - Álemde 50 mıllıonǵa jýyq kompıýter zııandy baǵdarlamalarmen zaqymdanǵan, dep habarlady «Kasper zerthanasy».
Utro.ru saıtynyń jazýynsha, bul másele Windows operatsııalyq júıesi bazasynyń qurylǵylaryna qatysty bolyp otyr. Zertteý nátıjesine qaraǵanda, vırýsqa qarsy baǵdarlamalar ornatylsa da kompıýterlerdiń shamamen 5 paıyzy vırýspen zaqymdanǵan, al «qorǵalmaǵan» qurylǵylardyń ishinde onyń úlesi 13 paıyzdy qurady.
Mamandardyń derekterine súıensek, álemde 1,5-2 mlrd. derbes kompıýter bar eken jáne onyń úshten eki bóligi úıde nemese shaǵyn kompanııalarda paıdalanylady. Atap aıtqanda, qurylǵylardyń dál osy bóligi vırýspen zaqymdanýǵa jaqyn turady.
Vırýs «juqtyrǵan» derbes kompıýterlerdiń eleýli bóligi Reseıde, Ýkraınada, Belarýsta, Qazaqstanda jáne Túrkııada anyqtaldy. Sonymen qatar, bul turǵyda Indonezııa, Taıland, Fılıppın, Vetnam, Úndistan men Mysyrdaǵy jaǵdaı da máz emes kórinedi. Al kompıýterleri vırýspen eń az zaqymdanǵan elderdiń qatarynda Germanııa, Avstrııa, Shveıtsarııa, sondaı-aq Chehııa bar.
